قىزىلوردا قالاسىندا 47 جاستاعى ازاماتتىڭ دەنەسى ەكى كۇننەن كەيىن سىرداريا وزەنىنەن تابىلدى, دەپ حابارلايدى Egemen.kz.
ول 14 ماۋسىمنان بەرى حابارسىز كەتكەن. سۇڭگۋىرلەر 15 ماۋسىمدا 13.00-تەن باستاپ سىرداريا وزەنىنىڭ تومەنگى اعىسىنان 1,2 شاقىرىم ارالىقتا ىزدەۋ جۇمىستارىن جۇرگىزدى.
«قۇتقارۋشىلار تالسۋات ەلدى مەكەنىنە دەيىن موتورلى قايىقپەن سۋ بەتىمەن 15 شاقىرىم اۋماقتى قاراپ شىقتى. سونداي-اق «ياگودكا» ساياجايىنا ىزدەستىرۋ جۇرگىزىلدى. سول كۇنى 20.33 مينۋتتا ىزدەستىرۋ شاراسى ۋاقىتشا توقتاتىلدى. بۇل جۇمىستار 16 ماۋسىمدا تاڭعى ساعات 05.30-دان باستاپ قايتا جالعاستى. ناتيجەسىندە ساعات 16.30-دا ونىڭ ءمايىتى سۋدان شىعارىلىپ, تۋىستارىنا تابىستالدى», دەپ ءمالىم ەتتى وبلىستىق توتەنشە جاعدايلار دەپارتامەنتى ءورت ءسوندىرۋ جانە اۆاريالىق قۇتقارۋ جۇمىستارى قىزمەتىنەن.
ىزدەستىرۋ جۇمىستارىنا بارلىعى 15 ادام مەن 6 اۆتوكولىك, ونىڭ ىشىندە وبلىستىق توتەنشە جاعدايلار دەپارتامەنتىنەن 8 قۇتقارۋشىسى مەن 3 تەحنيكا جۇمىلدىرىلدى.