اقتوبەدە قارجى پيراميداسىن ۇيىمداستىرۋشىلار سوتتالدى

اقتوبە وبلىسى بويىنشا ەكونوميكالىق تەرگەپ-تەكسەرۋ دەپارتامەنتى الماتى, نۇر-سۇلتان, شىمكەنت, اقتوبە جانە ورال قالالارىندا سەنىمدى ازاماتتاردىڭ اقشاسىن تارتۋ بويىنشا الاياقتىق سحەمانى انىقتاعان.

«قارجى پيراميداسىن ۇيىمداستىرۋشىلار وزدەرىن Unique finance شەتەلدىك كومپانياسىنىڭ وكىلدەرى رەتىندە كورسەتە وتىرىپ, حالىققا Pepsi, Nike, Microsoft, Ford جانە BMW سياقتى ءىرى حالىقارالىق كومپانيالاردىڭ باعالى قاعازدارىنا اقشا ينۆەستيتسيالاۋدى ۇسىنعان.

ونىڭ ورنىنا سالىمشىلارعا سالىنعان سومانىڭ 6 پايىزى, جاڭا سەرىكتەستىڭ سالىم سوماسىنىڭ 5 پايىزى مولشەرىندە اي سايىنعى پايدا ۋادە ەتىلگەن. بۇل رەتتە, ەڭ مينيمالدى سالىم 1000 اقش دوللارى.

باعالى قاعازداردىڭ ورنىنا حالىققا جالعان اكتسيالار بەرىلىپ, ولاردىڭ قاراجاتىن قارجى پيراميداسىن ۇيىمداستىرۋشىلار يەلەنىپ وتىرعان», دەلىنگەن حابارلامادا.

ۇيىمداستىرۋشىلار 3 جانە 3,5 جىلعا سوتتالدى.

اگەنتتىك مالىمەتىنشە, بۇگىنگى تاڭدا نارىقتا ازاماتتاردى ءوز جوبالارىنا اقشا سالۋعا شاقىراتىن كريپتوۆاليۋتا, شەتەلدىك كومپانيالاردىڭ اكتسيالارى, زەرگەرلىك بۇيىمدار, تۋريستىك جولدامالار, باسقا تاۋارلار مەن قىزمەتتەردى ساتاتىن كومپانيالار كوبەيىپ كەتكەن. سونىمەن قاتار اقشا تابۋدىڭ مۇنداي تەز جانە وڭاي ءتاسىلى ۇلكەن قارجىلىق شىعىندارعا اكەپ سوقتىرۋى مۇمكىن ەكەنى ەسكەرتەدى.