«جاسىل ايماق» دەپ جايباراقات جۇرگەنىمىزبەن, شىعىس قازاقستاندا كۇن سايىن 60-تان استام ادام جامان ىندەتكە شالدىعىپ جاتىر. وبلىستىق دەنساۋلىق ساقتاۋ باسقارماسى وكىلدەرىنىڭ مالىمەتىنە سۇيەنسەك, وبلىس اۋماعىندا جالپى كوروناۆيرۋس ينفەكتسياسىنىڭ 28 مىڭنان استام جاعدايى تىركەلگەن.
وتكەندە ءبىر كۇندە COVID-19 ينفەكتسياسىن جۇقتىرۋدىڭ 70 جاعدايى تىركەلدى. ونىڭ ىشىندە 16 جاعدايى كوۆيدتى پنەۆمونيا ەكەن. دارىگەرلەردىڭ ايتۋىنشا, وكپەگە جابىسقان كەسەلدىڭ كوبى وسكەمەندىكتەردەن انىقتالعان. ىندەتتىڭ كەزەكتى تولقۋىنا وبلىستا دايىندىق قارقىندى جۇرگەندىكتەن, ناۋقاستارعا توسەكتىك ورىن جەتكىلىكتى. مەديتسينالىق كومەك دەر كەزىندە كورسەتىلىپ كەلەدى. ىندەتتىڭ الدىن الۋ ءۇشىن ەكپە ەگۋ ءۇشىن دە جان-جاقتى شارالار اتقارىلىپ جاتىر. كەيبىر كاسىپورىندار ۆاكتسينا العان جۇمىسشىعا باعالى زاتتاردىڭ سەرتيفيكاتىن بەرسە, ەندى ءبىرى دەمالىس ورىندارىنا جولداما ۇسىنىپ جاتىر. ەڭ باستىسى, ەكپە الىپ, اۋرۋدىڭ الدىن الساڭىز بولعانى. ەكىنشى جاعىنان Ashyq باعدارلاماسى ورناتىلعان ورىندارعا كەدەرگىسىز كىرىپ-شىعۋعا مۇمكىندىك بار كورىنەدى.
اق جەلەڭدى ابزال جانداردىڭ پىكىرىنشە, ۆاكتسينا ادامدى COVID-19 ينفەكتسياسىنان قورعايدى. جۇقتىرىپ العان كۇننىڭ وزىندە, سىرقات اناعۇرلىم جەڭىل وتەدى. ايتا كەتسەك, بۇگىنگى تاڭدا شىعىس قازاقستاندا ۆاكتسينانىڭ ءبىرىنشى كومپونەنتىن 155 مىڭنان استام ادام السا, ەكىنشى كومپونەنتىن 73,6 مىڭ ادام العان. ۆاكتسينا العانداردىڭ ىشىندە ايگىلى سپورتشى ولگا رىپاكوۆا دا بار.
– ۆاكتسينا – كوۆيدتىڭ اسقىنۋىنان قورعايتىن سەنىمدى ءادىس. مەن ءوزىمدى جانە جاقىندارىمدى قورعاعىم كەلەتىندىكتەن ەكپە سالدىردىم. بۇرىنعى ۇيرەنشىكتى ومىرىمىزگە قايتا ورالعىمىز كەلسە, شەتەلگە ەمىن-ەركىن ساياحاتقا شىعىپ, الاڭسىز ءجۇرۋ ءۇشىن ۆاكتسينا الۋىمىز كەرەك, – دەدى ايگىلى اتلەت ولگا رىپاكوۆا.
شىعىس قازاقستاندا حالىقتى جاپپاي ۆاكتسينالاۋ جالعاسىپ جاتىر. ەسكە سالا كەتسەك, ەلىمىزدە كەزەڭ-كەزەڭىمەن يممۋنداۋ 1 اقپاننان باستالعان. كوروناۆيرۋستى جۇقتىرۋ قاۋپى جوعارى اۋماقتا جۇمىس ىستەيتىن دارىگەرلەر, مۇعالىمدەر, پوليتسيا قىزمەتكەرلەرى, سوزىلمالى اۋرۋلارى بار ادامدار ۆاكتسينانى العاشقىلاردىڭ ءبىرى بولىپ الا باستاعان.
مەكتەپ مۇعالىمدەرى دە كوروناۆيرۋسقا قارسى ۆاكتسينالاۋدىڭ ماڭىزىن تۇسىنگەن كورىنەدى. ويتكەنى جاپپاي ەكپە الىپ جاتىر. بۇگىنگى تاڭدا وڭىردە 12 مىڭنان استام مۇعالىم يممۋنداۋدان ءوتتى. وسكەمەن قالاسىنىڭ №2 جالپى ءبىلىم بەرەتىن مەكتەبىنىڭ ديرەكتورى جانات وماروۆانىڭ ايتۋىنشا, 1 ساۋىردەن باستاپ مەكتەپ ۇجىمى مۇشەلەرىنىڭ 50 پايىزدان استامى ۆاكتسينا الدى.
– ۆاكتسينالاۋدىڭ باستالعانى تۋرالى حابارلاعان كەزدە ءبىزدىڭ قىزمەتكەرلەرىمىز ەكپە الۋعا دايىن ەكەندىكتەرىن ءبىلدىردى. الەۋمەتتىك سالا قىزمەتكەرلەرى, ونىڭ ىشىندە پەداگوگتەر مۇنىڭ ماڭىزدىلىعىن تۇسىنەمىز. ارينە, وقۋشىلارىمىزدىڭ مەكتەپكە ورالىپ, ءداستۇرلى فورماتتا وقىعانىن قالايمىز. بۇل ءۇشىن ۇجىمدىق يممۋنيتەت قالىپتاستىرۋىمىز كەرەك, – دەدى مەكتەپ ديرەكتورى جانات مۇحتارقىزى.
شىعىس قازاقستاننىڭ قالالارى مەن اۋداندارى بويىنشا ايتار بولساق, وبلىس ورتالىعىندا 1800-دەن استام پەداگوگ, سەمەيدە 1900-دان استام, ءۇرجار اۋدانىندا 1 مىڭعا جۋىق, اياگوز اۋدانىندا 900-گە جۋىق پەداگوگ ۆاكتسينالاندى. جارما, كاتونقاراعاي, كوكپەكتى, تارباعاتاي جانە التاي اۋداندارىندا 600-دەن استام مۇعالىم كوروناۆيرۋسقا قارسى ۆاكتسينا الدى. زايسان اۋدانىندا 500-دەن استام مۇعالىمگە ەكپە جاسالدى. گلۋبوكوە جانە بورودۋليحا اۋداندارىندا 450-دەن استام, ۇلان اۋدانىندا 440-تان استام, اباي اۋدانىندا 420-عا جۋىق, ريددەردە 350-گە جۋىق, بەسقاراعاي اۋدانىندا 295-كە جۋىق وقىتۋشى COIVD-19-دان قورعالدى.