شارىن شاتقالىندا ءبىر توپ تۋريست شاتقالدان شىعا الماي قالدى, دەپ حابارلايدى Egemen.kz الماتى وبلىسى توتەنشە جاعدايلار دەپارتامەنتىنە سىلتەمە جاساپ.
11 ماۋسىمدا شامامەن 20:00-دە الەۋمەتتىك جەلىدە, اتاپ ايتقاندا بلوگەر تايىر ماراسۋلوۆتىڭ ينستاگرام-اككاۋنتىندا كومەككە شاقىرۋ تۋرالى جازبا جاريالانعان.
دەرەۋ وقيعا ورنىنا الماتى وبلىسىنىڭ توتەنشە جاعدايلاردى جويۋ ءبولىمىنىڭ كۇشتەرى مەن قۇرالدارى جانە «شارىن شاتقالى» مەملەكەتتىك عىلىمي-وندىرىستىك كاسىپورنى قىزمەتكەرلەرى جىبەرىلدى. زارداپ شەككەندەر مەن قۇربان بولعاندار جوق.
تجد 11 ماۋسىمدا كىشى شارىن شاتقالى اۋماعىندا جاۋىن-شاشىن اسەرىنەن كولبەۋ اعىن پايدا بولعانىن, سوعان بايلانىستى سول جەردە داۋىلدى ەسكەرتۋ جاريالانعانىن اتاپ ءوتتى.
جەتى ادامنان باسقا دەمالۋشىلار بولعان جوق. توتەنشە جاعدايلار دەپارتامەنتى كەزەكتى رەت ازاماتتاردى اۋا رايىنىڭ وزگەرۋىن قاداعالاپ, ساقتىق شارالارىن ساقتاۋعا شاقىردى.