بۇل تۋرالى شىمكەنت قالاسى قۇرىلىس باسقارماسىنىڭ باسشىسى ەربول احمەتوۆ ينستاگرام پاراقشادا تىكەلەي̆ ەفيردە سۇحبات بەردى. ەفيردە باسقارما باسشىسى قۇرىلىسى جۇرگىزىلىپ جاتقان نىسانداردىڭ بارىسى تۋرالى ايتتى, دەپ حابارلايدى Egemen.kz.
بيىل ميلليوندى قالادا 113 نىساننىڭ قۇرىلىسى جوسپارلانعان. ولاردىڭ ىشىندە 79 تۇرعىن ءۇي (4832 پاتەر, 281,1 مىڭ ش.م.), 15 ينجەنەرلىك ينفراقۇرىلىم نىساندارى, 11 ءبىلىم بەرۋ نىسانى, 2 اباتتاندىرۋ نىسانى, 3 مادەنيەت, 1 توتەنشە جاعداي, 2 سپورت كەشەنى بار.
«قۇرىلىس سالاسىندا نەگىزگى باسىمدىق كوپقاباتتى تۇرعىن ۇيلەر قۇرىلىسىنا بەرىلىپ وتىر. قۇرىلىس «نۇرلى جەر» باعدارلاماسى اياسىندا جۇرگىزىلۋدە. قازىرگى تاڭدا تۇرعىن ءۇي قۇرىلىسى تۇران شاعىن اۋدانى مەن اكىمشىلىك-ىسكەرلىك ورتالىعىندا اتقارىلىپ جاتىر.
وندا بيىل 61 تۇرعىن ءۇيدىڭ (3848 پاتەر) قۇرىلىسى جۇرگىزىلەدى (49 ءۇي كرەديتتىك, 12 ءۇي ارەندالىق). قالعان 32 ءۇيدىڭ قۇرىلىسى 2022 جىلعا تيەسىلى. ال اكىمشىلىك-ىسكەرلىك ورتالىعىندا 6 ارەندالىق ءۇيدىڭ (336 پاتەر) قۇرىلىس جۇمىستارى جۇرگىزىلۋدە. بيىل تولىق پايدالانۋعا تاپسىرىلادى.
سونىمەن قاتار 8 كوممۋنالدىق تۇرعىن ءۇيدىڭ (432 پاتەر) كونكۋرسى اياقتالىپ, مەردىگەرى انىقتالىپ, ونىڭ قۇرىلىسىنا دايىندىق جۇمىستارى باستالىپ كەتتى. سونداي-اق ارعىنبەكوۆ كوشەسىندەگى 4 كرەديتتىك تۇرعىن ءۇيدىڭ (216 پاتەر) قۇرىلىسى جالعاسىپ جاتىر. پايدالانۋعا تاپسىرۋ مەرزىمى تامىز-قاراشا ايلارىنا جوسپارلانعان», دەدى باسقارما باسشىسى.
ينجەنەرلىك ينفراقۇرىلىم نىساندارى بويىنشا بۇل جىلى 15 نىساندا قۇرىلىس جۇرەدى. جىل سوڭىنا دەيىن 6 نىسان پايدالانۋعا بەرىلەدى. سونداي-اق 1 920 ورىنعا ارنالعان 4 مەكتەپ پايدالانۋعا تاپسىرىلادى. ال قۇرىلىسى جاڭادان باستالاتىن 7 نىساننىڭ كونكۋرسى اياقتالىپ, مەردىگەرلەرى انىقتالدى.
ودان بولەك, قولدانىستاعى مەملەكەتتىك زوولوگيالىق ساياباعىن قايتا قۇرۋ, بوزارىق-3 شاعىن اۋدانىنداعى اۋىر اتلەتيكادان وليمپيادا رەزەرۆىن دايىندايتىن بالالار مەن جاسوسپىرىمدەردىڭ ماماندىرىلعان سپورت مەكتەبىن سالۋ, ق.مۇنايتپاسوۆ اتىنداعى ورتالىق ستاديونىن قايتا قۇرۋ, مادەنيەت ورتالىعى سياقتى جوبارلار جۇزەگە اسپاق.