اتىراۋدا تۇركيالىق ينۆەستوردىڭ قارجىلاندىرۋىمەن 10 ملن دوللاردىڭ جوباسى ىسكە اسىرىلۋى مۇمكىن, دەپ حابارلايدى Egemen.kz.
وبلىس اكىمى ماحامبەت دوسمۇحامبەتوۆ تۇركيالىق «BRIMSTONE Sulphur Provider Company» كومپانياسىنىڭ نەگىزىن قالاۋشى ەفە مۋنيپ نۋردوعدۋمەن كەزدەسىپ, حيميا ونەركاسىبى سالاسىنا قاتىستى جوبالاردى تالقىلادى.
وبلىس اكىمىنىڭ ايتۋىنا قاراعاندا, مەملەكەت باسشىسى قاسىم-جومارت توقاەۆ قازاقستان حالقىنا ارناعان جولداۋىندا اتاپ كورسەتكەندەي, ەلىمىزدىڭ باتىستاعى وڭىرلەرى مۇناي-حيميا كەشەنىن سالىپ, جوعارى دەڭگەيدەگى قايتا وڭدەۋ ءىسىنىڭ جاڭا وندىرىستىك تسيكلدارىن قۇرۋعا ەرەكشە نازار اۋدارىپ وتىر. وسى ورايدا اتىراۋ وبلىسىندا دا بىرقاتار اۋقىمدى جوبا قولعا الىنىپ, ينۆەستيتسيا تارتۋ جۇمىستارى جۇرگىزىلىپ جاتىر.
تۇركيا ينۆەستورى اتىراۋ وبلىسىندا كۇكىرت بەتونيتىن وندىرەتىن ءوندىرىس ورنىن اشۋعا نيەتتى بولىپ وتىر. ينۆەستيتسيا كولەمى شامامەن 10 ملن اقش دوللارىن قۇرايتىن جوبادا 50-گە جۋىق ادام تۇراقتى جۇمىس ىستەمەك.
«قازاقستاندا كۇكىرتتىڭ جەتكىلىكتى قورى بار. الايدا, ءبىز ءۇشىن دە, جالپى ەل ءۇشىن دە شيكىزاتتى تەرەڭ وڭدەۋدى ۇيىمداستىرۋ, دايىن ءونىمدى كۇكىرت بەنتونيتى تۇرىندە شىعارىپ, شەتەل نارىعىنا ەكسپورتتاۋ الدەقايدا ءتيىمدى. لوگيستيكالىق تۇرعىدان العاندا, اتىراۋ وبلىسى – بۇل جوبانى جۇزەگە اسىرۋ ءۇشىن وتە ىڭعايلى ينۆەستيتسيالىق الاڭ. وسى وبلىستان قىتاي, ەۋروپا مەن رەسەي نارىعىنا شىعۋدىڭ ءتيىمدى تۇسى كوپ», دەيدى مۋنيپ نۋردوعدۋ.
ونىڭ ايتۋىنشا, تۇركيانىڭ يزمير قالاسىنداعى زاۋىت كۇكىرت پەن ىلەسپە ونىمدەرىن ەۋروپا ەلدەرىنە شىعارادى. تۇركيالىق كومپانيانىڭ ونىمدەرى اۋىل شارۋاشىلىعى سالاسىندا اسىرەسە, سورتاڭ ءارى تۇزدى جەرگە تابيعي تىڭايتقىش رەتىندە قولدانىلادى.
سونداي-اق تۇركيا ينۆەستورى «تەڭىزشەۆرويل» جشس-ءنىڭ وكىلدەرىمەن شيكىزاتپەن قامتاماسىز ەتۋ ماسەلەسىنە قاتىستى كەلىسسوزدەر جۇرگىزدى.