مادەنيەت جانە سپورت مينيسترلىگى مەن نۇر-سۇلتان قالاسى اكىمدىگىنىڭ قولداۋىمەن «استانا وپەرا» تەاترىنىڭ ترۋپپاسى اشىق اسپان استىندا ونعا جۋىق تەگىن كونتسەرت بەرمەك. ەلوردا تۇرعىندارى مەن قوناقتارى قالا الاڭدارى – مامبەتوۆ كوشەسىندەگى اففاري بو الدى مەن ورتالىق قالالىق ساياباقتاعى امفيتەاتر ساحناسىندا اسقاق ونەرمەن قاۋىشا الادى.
«شىعارماشىلىق ۇجىمىمىز العاش رەت اشىق الاڭدا ونەر كورسەتكەلى تۇرعان جوق. جىل سايىن دج.ۆەرديدىڭ «ايدا» وپەراسى سىندى عالامات سپەكتاكلدەردى اشىق اسپان استىندا ورىنداپ ءجۇرمىز. وسىنداي جوبالار اعارتۋشىلىق سيپاتتا جاسالىپ, اسقاق ونەردى تانىتۋعا باعىتتالىپ وتىر. بىرقاتار توسىنسىي ازىرلەدىك, ولاردىڭ ءبىرى – يتاليا, شۆەيتساريا, جاپونيا, رەسەي مەن چەحيادان كەلگەن شەتەلدىك ارتىستەردىڭ ونەر كورسەتۋى», دەدى «استانا وپەرا» تەاترىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى عالىم احمەدياروۆ.
كونتسەرتتەردىڭ باعدارلاماسى ەرەسەكتەرگە دە, بالالار اۋديتورياسىنا دا ورتاق. جاس كورەرمەندەردى 13 جانە 19 ماۋسىم كۇندەرى ساعات 12:00-دە اففاري ساحناسىندا وتەتىن «بالالار سىيعا تارتقان ونەر» اتتى كونتسەرت كۇتۋدە. ءار كۇندەرى بالالارعا جارقىن بالەتتىك جانە حور نومىرلەرى ۇسىنىلادى. بالالار تەاترلىق ستۋدياسىنىڭ جەتەكشىسى – التىنعانىم احمەتوۆا.
ال 13 ماۋسىم ساعات 20:00-دە اففاري ساحناسىندا وتەتىن «ۆوكالدىق مۋزىكا جاۋھارلارى» كونتسەرتى جەكسەنبىلىك كەشتىڭ رومانتيكالىق اسەرىن ارتتىرا تۇسپەك. كوپشىلىك نازارىنا وپەرالاردىڭ بەلگىلى اريالارى مەن دۋەتتەرى, تانىمال حالىق اندەرى مەن رومانستار, اسپاپتىق پەسالار ۇسىنىلادى. مۋزىكالىق جاۋھارلار «استانا وپەرا» تەاترىنىڭ وپەرا سوليستەرى مەن وركەستر ارتىستەرىنىڭ ورىنداۋىندا ۇسىنىلماق.
ابزال ءمۇحيتديننىڭ «جىلدىڭ سەگىز مەزگىلى: انتونيو ۆيۆالدي مەن استور پياتستسوللا» اۆتورلىق كونتسەرتى 12-13 ماۋسىم ساعات 20:00-دە ورتالىق قالالىق ساياباقتاعى امفيتەاتردا وتەدى. انتونيو ءۆيۆالديدىڭ «جىل مەزگىلدەرى» جانە استور پياتستسوللانىڭ شىعارمالارى – ءوز زامانىنداعى, سونداي-اق قازىرگى تاڭدا دا وزەكتى مۋزىكا مادەنيەتىنىڭ ەڭ جارقىن ۇلگىلەرىنىڭ قاتارىندا. سوليستەر – «استانا وپەرا» سيمفونيالىق وركەسترىنىڭ ءبىرىنشى سكريپكالارى باعدات ءابىلحانوۆ پەن ايسۇلۋ بايكەنوۆا.
اپتا سوڭىندا 26 جانە 27 ماۋسىم كۇندەرى ساعات 20:00-دە ورتالىق قالالىق ساياباقتاعى امفيتەاتردا وپەرا-گالا ۇسىنىلماق. «استانا وپەرا» تەاترىنىڭ جەتەكشى وپەرا سوليستەرى, حور ارتىستەرى مەن سيمفونيالىق وركەسترى قازاقستاندىق اۆتورلار مەن باتىس ەۋروپالىق كلاسسيك كومپوزيتورلاردىڭ وپەرالىق اريالارى مەن دۋەتتەرىن, اسپاپتىق ءارى حورعا ارنالعان شىعارمالارىن ورىندايدى.
سونىمەن قاتار «استانا وپەرانىڭ» بىرەگەي جوباسى – PICCOLO تەاترى 5 شىلدە كۇنى ساعات 20:00-دە قالالىق ساياباقتا ءوز رەپەرتۋارىنىڭ ءىنجۋ-مارجانى – گاەتانو دونيتسەتتيدىڭ «دون پاسكۋالە» ەكى ءبولىمدى دراما-بۋففاسىن ۇسىنادى. قويۋشى ديريجەر – قازاقستاننىڭ ەڭبەك سىڭىرگەن قايراتكەرى ابزال مۇحيتدين, قويىلىمنىڭ كوركەمدىك جەتەكشىسى – اللا سيمونيشۆيلي, ستسەنوگراف ءارى كوستيۋمدەر بويىنشا سۋرەتشى – مانانا گۋنيا. ورىنداۋشىلاردىڭ جۇلدىزدى قۇرامى ەلوردالىق جۇرتشىلىق كوڭىلىن قۋانتپاق. نورينا – ليبۋشە سانتوريسوۆا (چەحيا), ەرنەستو – ەتسۋو دوي (جاپونيا), مالاتەستا – الەكسەي شاپوۆالوۆ (رەسەي), دون پاسكۋالە – انتۋان بەرنحەيم (شۆەيتساريا), كارليتو – ەرۇلان كامەل. ديريجەر – كوررادو ۆالۆو (يتاليا). ال استانا كۇنىندە (6 شىلدەدە) ورتالىق قالالىق ساياباقتاعى امفيتەاتر ساحناسىندا مەرەكەلىك گالا-كونتسەرت وتپەك.