قازاقتىڭ سالت-داستۇرىندە كەلىننىڭ موينىنا ارتىلعان مىندەت كوپ. تۇرمىستاعى شارۋاسىنان بولەك, مىنەز-قۇلقىنا, كيىم كيىسىنە دەيىن كوڭىل بولگەن ەلمىز. زاماننىڭ دامىعانىنا قاراي ما, كىم ءبىلسىن, ىقىلىم زاماننان بەرى كەلە جاتقان ءتاپ-ءتاۋىر داستۇرلەرىمىزدى كەي-كەيدە ەسكەرمەي جاتامىز. قازاق عۇرپىن ۇمىتپاۋ ءۇشىن, كەرىسىنشە ۇلىقتاۋ ءۇشىن ۇلان اۋدانىندا «اياۋلى جاس كەلىن-2021» وبلىستىق بايقاۋى ءوتتى.
جىل سايىن ۇيىمداستىرىلاتىن ءداستۇرلى بايقاۋدىڭ باستى ماقساتى – جاستار اراسىندا وتباسىلىق قۇندىلىقتاردى دارىپتەۋ, اتا داستۇردەن الىستاماۋ. اتا ءداستۇر دەمەكشى, ديداحمەت ءاشىمحانوۆتىڭ «سارى ساماۋىر» دەگەن اڭگىمەسى ويعا ورالدى. اڭگىمەدە ادەت-عۇرىپ تۇگىلى, ءۇيدىڭ تىرلىگىنە يكەمى جوق جاس كەلىن سوناۋ اتادان بالاعا ميراس بولىپ كەلە جاتقان ساماۋىردىڭ كەڭىردەگىن قىزىل شوقپەن كەپتەي بەرگەن. ءسويتىپ ءجۇرىپ اۋىزۇيگە كىرىپ بويانعان, كىرپىگىن تۇزەگەن, قاسىن جۇلعان... سول ەكى ارادا ساماۋىردىڭ سۋى سارقىلىپ ءبۇيىرى بالقىپ كەتكەن ەكەن. بۇل جەردە جازۋشىنىڭ ايتپاعى, قازاقى ءداستۇرىمىزدى سارى ساماۋىرداي جوعالتىپ بارا جاتقاندىعىمىز ەدى. زاماننىڭ اعىمىنا قاراي اتا-سالتتى ءتۇپ-تامىرىمەن قايتارماساق تا «اياۋلى جاس كەلىن» دەگەندەي بايقاۋلار كەرەك-اق.
– الدىن الا ىرىكتەۋ كەزەڭى ايماقتىڭ ءار قالاسى مەن اۋداندارىندا ءوتتى. سودان سۋىرىلىپ شىققاندار وبلىستىق دەڭگەيدە ءوز اۋداندارىنىڭ نامىسىن قورعايدى, – دەدى شقو جاستار ورتالىعىنىڭ ديرەكتورى ارايلىم ەسىمبەكوۆا.
بىرنەشە كەزەڭنەن تۇراتىن بايقاۋعا شىعىس قازاقستاننىڭ ءار اۋدانىنان ون التى كەلىن قاتىستى. ءبارى بارىنشا سالت-داستۇردەن الىستاماعاندىقتارىن دالەلدەدى. العاشقى كەزەڭدە كەلىندەر باۋىرساق ءپىسىرىپ, شاي قايناتىپ, داستارقاندى جايناتىپ جىبەردى. ادىلقازىلار تاراپىنان قويىلعان ساۋالدارعا جاۋاپ بەردى. «اس ادامنىڭ ارقاۋى» اتتى بولىمىندە قازىلار القاسىن قازاق اسحاناسىندا ۇمىتىلىپ بارا جاتقان تاعامداردى دايىنداپ تاڭ قالدىردى. سونداي-اق قازاقى كەلىنگە ءتان ءوز ونەرلەرىن دە كورسەتتى.
بايقاۋ ءبىر كۇندىك بولعانىمەن, كەلىندەر جىل كولەمىندە دايىندالدى. سايىس بولعاندىقتان, ءبىرى-بىرىنەن باسىم ءتۇسۋى زاڭدىلىق. قازىلار القاسىنىڭ شەشىمىمەن ءۇشىنشى ورىندى اياگوز اۋدانىنىڭ كەلىنى ەركەجان ۆادينوۆا قاناعات تۇتتى. ەكىنشى ورىندى شەمونايحا اۋدانىنان قاتىسقان جانيا حيسابەك ەنشىلەدى. ال شىعىس قازاقستان وبلىسىنىڭ «ۇزدىك كەلىنى» اتاعىنا ۇرجارلىق تالشىن يۋسۋپاحۋنوۆا يە بولدى. ولاردىڭ بارلىعى ارنايى ديپلومدارمەن جانە اقشالاي سىيلىقتارمەن ماراپاتتالدى.
ايتا كەتسەك, بايقاۋعا قاتىسۋشىلار ءۇي شارۋاسىمەن عانا اينالىسىپ قويماي, ءارتۇرلى سالالاردا ەڭبەك ەتەدى. ءبىرى مۇعالىم بولسا, ەندى ءبىرى – دارىگەر. اراسىندا مەملەكەتتىك قىزمەتكەرلەر دە بار ەدى.
شىعىس قازاقستان وبلىسى