نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا ۆاكتسينانىڭ ءبىرىنشى كومپونەنتىن 170 مىڭعا ەلوردالىق العانىن ايتا كەلە مەكتەپتەردىڭ وفلاين فورماتقا قاشان كوشەتىنىن ءمالىم ەتتى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
ء«بىر جىلدان استام ۋاقىت بۇرىن پاندەميا باستالىپ, بۇل ىندەتتىڭ بارلىق جاعىمسىز سالدارىن بىلدىك. وسى جىلدىڭ باسىنان بەرى تۇرعىنداردى ۆاكتسينالاۋ باستالدى. ۆاكتسيناتسيا – COVID-19 جەڭۋدىڭ, دەنساۋلىعىڭىزدى, تۋىستارىڭىز بەن اينالاڭىزداعى ادامداردىڭ دەنساۋلىعىن قورعاۋدىڭ جالعىز ءتيىمدى ءادىسى. قالىپتى ومىرگە ورالۋ ءۇشىن ۇجىمدىق يممۋنيتەتتى قالىپتاستىرۋ قاجەت.
كوروناۆيرۋسپەن كۇرەستە الدىڭعى شەپتە كەلە جاتقان مۇعالىمدەر, مەديتسينا قىزمەتكەرلەرى, ءتارتىپ ساقشىلارى, الەۋمەتتىك قىزمەتكەرلەر جانە ت. ب. ءبىرىنشى كەزەكتە ۆاكتسينا الۋى كەرەك. ويتكەنى ولار تەك وزدەرىن عانا ەمەس, ناۋقاستاردى, وقۋشىلاردى قاۋىپسىزدەندىرەدى. وسىلايشا اسا قاۋىپتى ىندەتتەن ارىلۋعا بولادى», دەپ جازدى التاي كولگىنوۆ.
قالا اكىمىنىڭ ايتۋىنشا, وقۋ فورماتى ۇجىمدىق يممۋنيتەت پەن پەداگوگتاردىڭ ەكپە الۋ كورسەتكىشىنە بايلانىستى بولادى. قازىر مۇعالىمدەردىڭ ەكپە سالۋ كورسەتكىشى 40%-دان استى. بىراق بۇل مەكتەپتەردى وفلاين فورماتتا اشۋ ءۇشىن جەتكىلىكسىز.
«وقۋشىلار دا, اتا-انالار دا وفلاين-وقىتۋ فورماتىنا ورالعىسى كەلەدى دەپ ايتسام قاتەلەسپەيمىن. ويتكەنى مۇعالىم-وقۋشى تەت-ا-تەت فورماتىندا ءبىلىم العانعا ەشتەڭە جەتپەيدى.
ۇجىمدىق يممۋنيتەتكە قول جەتكىزە وتىرىپ, قالا بۇرىنعى قالىپتى ومىرگە ورالا الادى. بارلىق قوعامدىق ورىندار اشىلىپ, قىزمەتكەرلەر قاشىقتان جۇمىس فورماتىنان ورالىپ, وقۋشىلار وفلاين فورماتتا وقي باستايدى, بيزنەس نىساندارى دا بۇرىنعىداي جۇمىس جاسايدى.
بۇگىنگى تاڭدا ۆاكتسينانىڭ ءبىرىنشى كومپونەنتىن ەلوردانىڭ 170 مىڭعا جۋىق تۇرعىنى الدى. ەگۋ پۋنكتتەرى ەمحانالاردا, سوو, ءسۇ جانە باسقا دا قوعامدىق ورىنداردا ورنالاستىرىلعان. ىندەتتى جەڭۋ ارقايسىمىزعا بايلانىستى ەكەنىن ەستەن شىعارماعان ءجون», دەيدى ەلوردا اكىمى.