وتىرىستا قازاقستان حالقى اسسامبلەياسىنىڭ XXIX سەسسياسىندا قابىلدانعان شەشىمدەر جانە جاھاندىق جاڭا سىن-تەگەۋرىندەر كەزىندە اسسامبلەيا جۇمىسىنىڭ تيىمدىلىگىن ارتتىرۋ ماسەلەلەرى قاراستىرىلدى, دەپ حابارلايدى Egemen.kz اقورداعا سىلتەمە جاساپ.
جيىندا ءسوز سويلەگەن قر مەملەكەتتىك حاتشىسى قىرىمبەك كوشەرباەۆ مەملەكەتتىڭ الەۋمەتتىك-ەكونوميكالىق تۇرعىدان تابىستى بولۋى حالىقتىڭ بىرلىگىنە, ەتنوسارالىق كەلىسىم مەن كونفەسسياارالىق تاتۋلىققا تىكەلەي بايلانىستى ەكەنىن ەرەكشە اتاپ ءوتتى. سونداي-اق ەل ىشىندەگى بەيبىتشىلىك پەن تىنىشتىق, حالىقارالىق قاۋىمداستىق الدىنداعى جوعارى بەدەل, ينۆەستورلاردىڭ سەنىمى مەن ەكونوميكالىق ءوسىم ەلباسى ن.نازارباەۆ ۇسىنعان بىرلىك فورمۋلاسىنىڭ ناتيجەسى ەكەنىن ايتتى.
سوندىقتان اسسامبلەيا ءوز جۇمىسىندا ءبىرتۇتاس قازاقستان حالقىنىڭ ورتاق قۇندىلىقتارى مەن مۇددەلەرىن قالىپتاستىرۋعا باسىمدىق بەرۋى قاجەت.
مەملەكەتتىك حاتشى قازاقستان حالقى اسسامبلەيانىڭ جۇمىسىن ينستيتۋتسيونالدىق جانە ينفراقۇرىلىمدىق تۇرعىدان ودان ءارى جەتىلدىرۋگە قاتىستى بىرقاتار ناقتى تاپسىرمالار بەردى.
كەڭەستىڭ كەڭەيتىلگەن وتىرىسىنا قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى مارات ءازىلحانوۆ, قازاقستان حالقى اسسامبلەياسى توراعاسىنىڭ ورىنباسارلارى مايا بەكباەۆا جانە زاكيرجان كۋزيەۆ, قر پارلامەنتى ءماجىلىسىنىڭ دەپۋتاتتارى, ورتالىق جانە جەرگىلىكتى اتقارۋشى ورگانداردىڭ باسشىلارى, قحا كەڭەسىنىڭ مۇشەلەرى, قوعام قايراتكەرلەرى, عىلىمي جانە شىعارماشىلىق زيالى قاۋىم وكىلدەرى قاتىستى.
وتىرىس بارىسىندا قازاقستان حالقى اسسامبلەياسى مەن اسسامبلەيا كەڭەسىنىڭ جاڭا قۇرامى ماقۇلداندى. ولاردىڭ قۇرامىنا قانداستار مەن جاستاردىڭ وكىلدەرى, ەتنومادەني بىرلەستىكتەردىڭ كەيىنگى تولقىن باسشىلارى ۇسىنىلدى. سونىمەن قاتار قازاقستان حالقى اسسامبلەياسىنىڭ رەسمي وكىلى بەكىتىلدى. اتالعان قىزمەتتى قازاقستان حالقى اسسامبلەياسى توراعاسىنىڭ ورىنباسارى, قحا جۋرناليستەر كلۋبىنىڭ توراعاسى م.بەكباەۆا اتقارادى.