ماسكەۋدە القابيلەر سوتى قازاقستاندىق ستۋدەنتتىڭ ولىمىنە كۇدىكتى ازاماتتى اقتاپ الدى. وسىعان بايلانىستى توميريس بايسافانىڭ اناسى پىكىر ءبىلدىردى, دەپ حابارلايدى Egemen.kz.
«بۇگىن سوت ۇكىمى شىقتى. سوت پروتسەسى اياقتالدى. مەنىڭ كەلەسى پروتسەسسۋالدىق ارەكەتتەرىم اپەللياتسيالىق شاعىم. مەن ودان ءارى كۇرەسەمىن», دەدى جاننا احمەتوۆا تىلشىلەرگە بەرگەن سۇحباتىندا.
بۇعان دەيىن سوتقا قاتىسقان 6 القابيدىڭ تورتەۋى مۋرتۋزالي مەدجيدوۆتى كىناسىز دەپ تانىعان ەدى. شەشىمگە ساي ايىپتالۋشىنى سوت زالىنان بوستاندىققا جىبەردى.
ەسكە سالايىق, 2018 جىلدىڭ ءساۋىر ايىندا ماسكەۋدىڭ حالىقارالىق قاتىناستار مەملەكەتتىك ينستيتۋتىنىڭ جانىنان جاراقاتى بار 21 جاستاعى قازاقستاندىق ستۋدەنت قىز تابىلادى. دەرەۋ سكليفوسوۆسك اتىنداعى ۇلتتىق زەرتتەۋ ينستيتۋتىنا اۋىر حالدە جەتكىزىلەدى. الايدا ول كوپ ۇزاماي قايتىس بولدى. كۋاگەرلەردىڭ ايتۋىنشا, قايعىلى وقيعاعا دەيىن ول ۋنيۆەرسيتەتتىڭ 4-ءشى قاباتىندا مۋرتۋزالي مەدجيدوۆپەن سوزگە كەلىپ قالعان.
ايتا كەتەيىك, مۋرتۋزالي مادجيدوۆ – بەلگىلى داعىستاندىق ساياساتكەر, داعىستان رەسپۋبليكاسى ۇكىمەتىنىڭ بۇرىنعى توراعاسى, كاسىپكەر مۇحتار مەدجيدوۆتىڭ ۇلى.
العاشقىدا ءتوميريستىڭ ءولىمى ءوز-وزىنە قول جۇمساۋعا ماجبۇرلەۋ بابى بويىنشا تەكسەرىلگەن. كەيىن ءىس كىسى ءولىمى بابىنا الماستىرىلدى. بيىل ناۋرىز ايىندا ءتوميريستىڭ شەشەسى پرەزيدەنت قاسىم-جومارت توقاەۆقا رەسەي تاراپىنا سوتتىڭ ادىلەتتى ءوتۋىن جانە القابيلەر سوتىنا قىسىم كورسەتىلمەۋىن جەتكىزۋدى سۇراعان بولاتىن.