باتىس قازاقستاندا نوسەر جاۋىن جولاۋشىلار مەن تۇرعىنداردى ابىگەرگە سالدى

ورال قالاسىندا ارنايى قىزمەت ورىندارىنىڭ كەزەكشى بولىمىنە تۇرعىنداردان مەكەنجايلاردى سۋ باسىپ جاتقانى جونىندە 400-دەن اسا قوڭىراۋ تۇسكەن.

باتىس قازاقستان وبلىستىق توتەنشە جاعدايلار جونىندەگى دەپارتامەنت جانىنان جەدەل شتاب قۇرىلىپ, 55-40-88 تەلەفون ءنومىرى ارقىلى قوڭىراۋ قابىلداۋعا كىرىستى. 4 ماۋسىم كۇنگى تاڭەرتەڭگى جاعداي بويىنشا, ورال قالاسى تۇرعىندارىنان 59 نىساندى سۋ باسقانى جونىندە اقپارات تۇسكەن. ودان بولەك, دەپارتامەنتتىڭ كەزەكشى بولىمىنە – 8, «112» قىزمەتىنە – 272, «109» قىزمەتىنە – 151 تۇرعىن قوڭىراۋ شالىپ, كومەك سۇراعان.

3 ماۋسىم كۇنى تۇندە ورال قالاسىنىڭ بىرقاتار بولىگىندە جارىق ءسونىپ, سۋ بەرۋ توقتاتىلعان ەدى. قالانى سۋمەن قامتيتىن «باتىس سۋ ارناسى» مەكەمەسىنىڭ 1968 جىلى سالىنعان №3 كارىزدىك-سورعى ستانساسىندا كارىزدىك كوللەكتور جارىلىپ, تۇنگى ساعات 02.00. شاماسىندا ماشينا ءبولىمىن سۋ باسقان ەكەن. ءسويتىپ, تۇنگى ساعات 03.00-دەن باستاپ ورال قالاسىنا سۋ بەرۋ توقتاتىلعان. سول كەزدەن باستاپ 23 قىزمەتكەر, 8 تەحنيكا اپاتتىق جوندەۋ جۇمىستارىنا كىرىسىپ, توقتاپ قالعان 5 سورعىنىڭ ەكەۋىن تاڭدا ىسكە قوستى. قالاعا سۋ بەرىلە باستادى. قۇتقارۋشىلار بۇگىن كۇندىز قالعان سورعىلار دا جۇمىسىنا كىرىسەدى دەپ جاتىر.

3 ماۋسىم كۇنى كەشكى ساعات 21.00.-دان باستالعان نوسەر جاۋىننىڭ اسەرىنەن وبلىس ورتالىعىندا 7 جەكە تۇرعىن ءۇيدى, 40-تان اسا اۋلانى, 8 الەۋمەتتىك نىساننىڭ جەرتولەسىن سۋ باسقان.

«توتەنشەلىكتەر مەن جەرگىلىكتى اتقارۋشى ورگان قىزمەتكەرلەرى ءتۇنى بويى تىنىم تاپقان جوق. تاڭعى ساعات 9-عا دەيىن 2045 تەكشەمەتر سۋ سورىلىپ الىندى. قۇتقارۋ جۇمىستارىنا 125 ادام, 45 تەحنيكا قاتىستى. ىشكى ىستەر قىزمەتكەرلەرى دە تۇنگى كەزەكشىلىكتە بىرگە ءجۇردى», دەيدى باتىس قازاقستان وبلىستىق توتەنشە جاعدايلار دەپارتامەنتى ءباسپاسوز قىزمەتىنىڭ وكىلى انەل قاينەدەنوۆا.

«قازگيدرومەت» مەكەمەسىنىڭ حابارلاۋىنشا باتىس قازاقستان وبلىسىندا قاتتى جەل, نوسەر جاۋىن مەن بۇرشاق قاتەرى ءالى دە بار.

تابيعاتتىڭ توسىن مىنەزىنەن جولاۋشىلار دا زارداپ شەكتى دەگەن ەدىك. 3 ماۋسىم كۇنى جانىبەك اۋدانى, ونەگەاۋىلىنىڭ تۇسىندا 6 اداممەن جولدا باتپاققا باتىپ قالعان »لارگۋس» اۆتوكولىگىن №21 ءورت ءسوندىرۋ بەكەتىنىڭ قىزمەتكەرلەرى قۇتقارىپ الدى. جولاۋشىلار الماتى قالاسىنان جانىبەك اۋدانىنا كەلە جاتقان ادامدار ەكەن.

سول كۇنى قازتالوۆ اۋدانى, اقكول اۋىلدىق وكرۋگى, تورەمۇرات قىستاعى ماڭىندا «ۆاز» ءاۆتوموبيلى لايساڭ بالشىققا كەپتەلىپ, 6 ادام, ونىڭ ۇشەۋى بالا, دالادا قالعان. ولاردى №17 ءورت ءسوندىرۋ بەكەتىنىڭ جەكە قۇرامى قۇتقاردى.

3 ماۋسىم كۇنى كەشكىسىن ورال قالاسى «مەتاليست» زاۋىتىن ماڭىندا جايىق وزەنىنە ماس كۇيىندە سۋعا ءتۇسىپ, اعىپ كەتە جازداعان 30 جاسار كەلىنشەك قۇتقارىلدى. وسىعان وراي باتىس قازاقستان وبلىسى توتەنشە جاعدايلار دەپارتامەنتى سۋعا باتىپ كەتۋدەن ادام ءومىرىن قۇتقارۋ كەزىندە كورسەتكەن ەرلىگى مەن قايسارلىعى ءۇشىن ۆيتالي سيپليۆىيدى العىس حاتپەن ماراپاتتادى.