قازاقستاننىڭ جانە رەسەيدىڭ پوشتا قىزمەتتەرى قازپوشتانىڭ «قورعاس – شىعىس قاقپاسى» اەا» جانە «جاركەنت» حالىقارالىق پوشتا الماسۋ ورنىنداعى بوند قويمالارى ارقىلى ترانزيتتىك تاسىمال كولەمىن ارتتىرماق, دەپ حابارلايدى Egemen.kz.
تاراپتار تىڭ لوگيستيكالىق شەشىمدەر نەگىزىندە حالىقارالىق پوشتا جونەلتىلىمدەرىن ەۋروپا جانە تمد ەلدەرىنە جەتكىزۋدى وڭتايلاندىرۋدى جوسپارلاپ وتىر. بۇل ءوز كەزەگىندە ترانسشەكارالىق ەلەكتروندىق كوممەرتسيانىڭ دامۋىنا وڭ ىقپالىن تيگىزەدى.
بۇگىن «قازپوشتا» اق باسقارما توراعاسى قانات الپىسباەۆ جانە «رەسەي پوشتاسى» اق باس ديرەكتورى ماكسيم اكيموۆ پەتەربور حالىقارالىق ەكونوميكالىق فورۋمى اياسىندا ستراتەگيالىق ىنتىماقتاستىق تۋرالى مەموراندۋمعا قول قويدى. قۇجات كورشىلەس ەلدەردەگى پوشتا قىزمەتتەرىنىڭ حالىقارالىق پوشتا جونەلتىلىمدەرىن ساقتاۋعا جانە تاسىمالداۋعا بايلانىستى ترانزيتتىك لوگيستيكالىق شەشىمدەر سالاسىنداعى ىقپالداستىقتى دامىتۋعا باعىتتالعان.
ء«بىز ۇلكەن ترانزيتتىك الەۋەتكە جانە لوگيستيكالىق ينفراقۇرىلىمعا يەمىز. قولىمىزداعى قوردىڭ سينەرگياسى باسىمدىققا يە باعىتتاردا ىنتىماقتاستىقتى كەڭەيتۋگە جول اشادى. ونىڭ ىشىندە ترانزيتتىك اعىنداردى ارتتىرۋعا, وڭتايلى لوگيستيكالىق باعدارلاردى قولدانۋعا, ە-commerce دامۋىنا جاڭا سەرپىن بەرۋگە مۇمكىندىك بەرەدى. قازپوشتا «قورعاس – شىعىس بەكەتى» ارنايى ەكونوميكالىق ايماعىندا جانە «جاركەنت» حالىقارالىق پوشتا الماسۋ ورنىندا ورنالاسقان بوند قويمالارىن دامىتۋعا باسا نازار اۋدارىپ وتىر. ءبىزدىڭ قۋاتتىلىقتاردى بارىنشا ماكسيمالدى دەڭگەيدە قولدانامىز», دەپ اتاپ ءوتتى «قازپوشتا» اق باسقارما توراعاسى قانات الپىسباەۆ.
قازاقستاندىق جانە رەسەيلىك پوشتا وپەراتورلارى بىرلەسە لوگيستيكالىق ونىمدەردى, ونىڭ ىشىندە ترانزيتتىك باعدارلاردى دامىتۋعا مۇددەلى. سەرىكتەستەر قولدانىستاعى ەۋروپاداعى ينفراقۇرىلىم ارقىلى حالىقارالىق پوشتا الماسۋدى جەدەلدەتۋدى جوسپارلاپ وتىر.
«ەۋروپادان, اقش-تان جانە قىتايدان كەلەتىن ەلەكتروندىق كوممەرتسيانىڭ اعىنى ارتىپ جاتقانىن ەسكەرسەك, ەەو ەلدەرىنىڭ پوشتا اكىمشىلىكتەرى اراسىندا ءتيىمدى لوگيستيكا قۇرۋ اسا ماڭىزدى. قازپوشتامەن بىرلەسە جاڭا ءتيىمدى باعدارلاردى قالىپتاستىرىپ, جونەلتىلىمدەردى جەدەل جانە قاۋىپسىز جەتكىزۋدى جانە ءبىزدىڭ ەلدەرىمىزدىڭ ترانزيتتىك الەۋەتىن ىسكە اسىرۋعا مۇمكىندىك بەرەدى», دەپ اتاپ ءوتتى «پوچتا روسسي» اق باس ديرەكتورى ماكسيم اكيموۆ.
ىنتىماقتاستىقتىڭ العاشقى كەزەڭىندە ءترانزيتتىڭ كولەمى بولجام بويىنشا ءبىر ايدا كەمىندە 24 توننا قۇرايدى. ونىڭ كولەمى كەلەشەكتە نارىقتىڭ سۇرانىسىنا بايلانىستى ەسەلەنەدى.
2020 جىلى قازاقستاننان رەسەيگە 380 مىڭ جانە كەرى باعىتتا 297 مىڭعا جۋىق حالىقارالىق پوشتا جونەلتىلىمى جەتكىزىلگەن. قازاقستان اۋماعى ارقىلى قىتايدان رەسەيگە ترانزيت كولەمى 327 توننادان استى. بۇگىندە قر جانە رف اراسىنداعى پوشتا الماسۋ اۋە جانە جەر ءۇستى كولىكتەرى ارقىلى جۇرگىزىلەدى.
اتاپ وتكەن ءجون, مەموراندۋمعا «سامۇرىق-قازىنا» اق جانە ونىڭ قورجىندىق كومپانيا وكىلدەرىنىڭ جۇمىس ساپارى بارىسىندا قول قويىلدى.