ەرەكشە ءبىلىم بەرۋ قاجەتتىلىكتەرى بار بالالارعا ارنالعان Juldyzai حالىقارالىق ونلاين-فەستيۆالىنە رەسەي, گرۋزيا, وزبەكستاننان جانە ءبىزدىڭ ەلىمىزدەن 10-18 جاس ارالىعىنداعى ءۇش مىڭعا جۋىق ونەرلى جەتكىنشەك قاتىسىپ, باق سىنادى.
قازىلار القاسىنىڭ شەشىمىمەن فينالدىق كەزەڭگە جولداما العان 379 بالانىڭ ىشىندە قاراعاندىلىق نۇرداۋلەت ساعاتبەك فەستيۆالدىڭ گران-پري جۇلدەسىنىڭ يەگەرى اتاندى.
قاراعاندى وبلىستىق ءبىلىم باسقارماسىنىڭ كورۋ قابىلەتى بۇزىلعان بالالارعا ارنالعان №1 ارنايى مەكتەپ-ينتەرناتىندا وقيتىن ون ءتورت جاستاعى ونەرپاز دينا نۇرپەيىسوۆانىڭ «بۇلبۇل» كۇيىن ورىنداپ, قازىلار القاسىنىڭ عانا ەمەس, تىڭداۋشىلاردىڭ دا ىستىق ىقىلاسىنا بولەندى.
نۇرداۋلەت مۋزىكامەن ەس بىلەتىن شاعىنان بەرى اينالىسادى. ۆوكالمەن دە شۇعىلدانادى جانە فورتەپيانودا دا جاقسى وينايدى ەكەن. بىراق دومبىرا ۇيىرمەسىنە 11 جاسقا كەلگەندە عانا جازىلىپتى.
– ءۇش جىل ىشىندە مەن 13 كۇي جانە ءبىر ءان جازدىم. ءانىمدى اتا-اناما ارنادىم. ءاننىڭ ءسوزىن وركەن مۇڭايتپاس جازعان. فەستيۆال كەزىندە مەن قاتتى ۋايىمدامادىم. نەگە دەسەڭىز, وزىمە سەنىمدى بولدىم جانە جەڭىسكە جەتەتىنىمە كۇمانىم بولمادى, – دەيدى بولاشاقتا كۇيشى, كومپوزيتور بولعىسى كەلەتىن ونەرلى ورەن.
جەڭىمپازدىڭ جەتەكشىسى نۇرداۋلەت ىدىرىسوۆتىڭ ايتۋىنشا, دارىندى جاستىڭ ءوزى اينالىسىپ جۇرگەن ىسكە دەگەن ادالدىعى, ەرەكشە ەڭبەكقورلىعى كەز كەلگەن ادامدى ءتانتى ەتەدى ەكەن. «بۇل جاس مۋزىكانتتىڭ جالعىز عانا جەڭىسى ەمەس. ول – وبلىستىق جانە رەسپۋبليكالىق بايقاۋلاردا تالاي مارتە توپ جارىپ جۇرگەن تالانت يەسى», دەيدى نۇرداۋلەتتىڭ جەتەكشىسى.
قاراعاندى