قىتاي حالىق رەسپۋبليكاسىمەن جۇرگىزىلگەن كەلىسسوزدەر ناتيجەسىندە ارنايى بورتپەن الماتىعا CoronaVac ۆاك تسينا سىنىڭ العاشقى پارتياسى كەلدى. پرەپاراتتى قىتايلىق Sinovac Biotech Ltd بيوفارماتسەۆتيكالىق كومپانياسى شىعارعان.
قىتايلىق CoronaVac ۆاكتسيناسىنىڭ العاشقى پارتياسى 500 مىڭ دوزادان تۇرادى. بۇل پرەپارات جاقىن كۇندەرى قازاقستان ازاماتتارىنا COVID-19 كوروناۆيرۋس ينفەكتسياسىنا قارسى ۆاكتسينالاۋ ءۇشىن قولجەتىمدى بولاتىن ءتورتىنشى پرەپارات بولادى.
قحر-دان CoronaVac ۆاكتسيناسىن جەتكىزۋ تۋرالى ۋاعدالاستىقتاردى ىسكە اسىرۋى COVID-19 پاندەمياسىنا بىرلەسىپ قارسى تۇرۋدا قىتايلىق ارىپتەستەرمەن باستالعان سىندارلى ىنتىماقتاستىقتى ءساتتى جالعاستىرۋدىڭ مىسالى رەتىندە قاراستىرىلادى.
دەنساۋلىق ساقتاۋ مينيسترلىگى اتاپ وتكەندەي, كەلىپ تۇسكەن ۆاكتسينانىڭ پارتياسى قازاقستاندىق جانە رەسەيلىك قولدا بار ۆاكتسينالارىمەن قاتار ەلدىڭ بارلىق ەگۋ پۋنكتتەرىندە قولجەتىمدى بولادى. CoronaVac ۆاكتسيناسىن دەنساۋلىق ساقتاۋ مينيسترلىگى قازاقستان اۋماعىندا قولدانۋعا ماقۇلدادى جانە ەلدە قولدانىلاتىن QazVac, سپۋتنيك V جانە Hayat Vax ۆاكتسينالارىنىڭ تىزبەسىن تولىقتىرادى. قازىرگى ۋاقىتتا CoronaVac پرەپاراتى الەمنىڭ كوپتەگەن ەلىندە كەڭىنەن قولدانىلادى.
قحر-دا حالىقتى ۆاكتسينالاۋ بويىنشا جالعاسىپ جاتقان كەڭ اۋقىمدى ناۋقانعا قاراماستان, قىتايلىق تاراپ جان-جاقتى جانە ستراتەگيالىق ارىپتەستىك پەن تاتۋ كورشىلىك قارىم-قاتىناستاردى اتاپ ءوتىپ, قازاقستانعا ءوزىنىڭ ازىرلەنگەن ۆاكتسيناسىن جىبەردى.
CoronaVac ۆاكتسيناسىندا SARS-CoV-2 انتيگەنى بار. ءبىر قۇتىدا 0.5 مل/دوزا, پرەپارات 14-28 كۇن ارالىعىمەن ەكى رەت ۆاكتسينالاۋدى كوزدەيدى. ۆاكتسينالاۋعا 18 جاستان اسقان تۇرعىندار ساناتتارى جاتادى. ۆاكتسينا +2+8 گرادۋس تەمپەراتۋرادا ساقتالادى.