اقتاۋ قالاسىنداعى NIS-تە «Caspian Startup – 2021» حالىقارالىق ستارتاپ-جوبالار بايقاۋىنىڭ قورىتىندىسى شىعارىلدى, دەپ حابارلايدى Egemen.kz.
ءۇشىنشى «Caspian Startup» بايقاۋىنىڭ تاقىرىبى رەتىندە جاڭاراتىن ەنەرگيا كوزدەرى تاڭدالدى – ۇيىمداستىرۋشىلار جاستاردى دا, كاسىپكەرلەردى دە بالامالى ەنەرگيا كوزدەرىمەن تانىستىرۋ ماقساتىن ۇستاندى.
ساراپشىلار مەن كاسىپكەرلەردەن جينالعان كونكۋرستىق كوميسسيانىڭ نازارىنا قازاقستان, ءازىربايجان جانە تۇرىكمەنستاننىڭ جاس زەرتتەۋشىلەرى قاتىسقان 89 جوبا ۇسىنىلدى. بايقاۋدىڭ اقتىق سىنىنا 15 جۇمىس جولداما الدى.
– جىلدان-جىلعا ءداستۇرلى بايقاۋ جەرگىلىكتى جانە حالىقارالىق دەڭگەيدە سۇرانىسقا يە ەكەنىن كورسەتىپ كەلەدى. بيىل بىزگە ازەربايجان وقۋشىلارىنان 2 جوبا جانە تۇرىكمەنستاننان 22 جۇمىس كەلىپ ءتۇستى, – دەيدى اقتاۋداعى زياتكەرلىك مەكتەپ ديرەكتورى اسەل بەيسەمبينوۆا.
«Caspian Startup» قاتىسۋشىلارىنىڭ كوپشىلىگى – NIS وقۋشىلارى. فينالعا قاتىسۋشىلار قاتارىندا اقتاۋ, اقتوبە, تاراز, شىمكەنت, قاراعاندى جانە كوكشەتاۋ قالالارىنداعى زياتكەرلىك مەكتەپتەردىڭ ستارتاپشىلارىنىڭ جۇمىستارى بولدى. سونداي-اق رەسپۋبليكانىڭ جالپى ءبىلىم بەرەتىن مەكتەپتەرىنىڭ وقۋشىلارى دا ءوز جوبالارىن ۇسىندى.
جەڭىمپازدار مەن جۇلدەگەرلەردى نوۋتبۋك, پلانشەت, سمارتفون سياقتى باعالى سىيلىقتار كۇتىپ تۇردى.
تۇرىكمەنستاننان كەلگەن وقۋشىلاردىڭ يدەيالارى ۇزدىك دەپ تانىلدى. بايقاۋدىڭ قورىتىندىسى بويىنشا I ورىن العان اشحاباد ستارتاپشىسى مەردان اقىجانوۆ جاھاندىق جىلىنۋ ماسەلەسىن شەشۋگە كومەكتەسەتىن ماقتا ساباعىنان بيووتىن ءوندىرۋدى ۇسىندى. جەڭىمپازدىڭ ەسەپتەۋى بويىنشا جوبانىڭ جىل سايىنعى تازا پايداسى 130 ميلليون دوللاردان اسۋى مۇمكىن. ەكىنشى ورىن ماگومەد ماكسۋدوۆ پەن شانۋر مازىەۆتىڭ جوباسىنا بۇيىردى, ولار Wi-Fi سيگنالىن ءبىر جارىم شاقىرىم قاشىقتىقتا ۇستاپ الۋعا مۇمكىندىك بەرەتىن راديو تولقىندارىن قۇرۋ يدەياسىن ۇسىندى. شىمكەنتتەگى NIS وقۋشىسى مۋحيت بەرديكۋل ءۇشىنشى ورىندى ەنشىلەگەن «Clean City» جوباسىن ازىرلەدى.
قازاقستاننىڭ جەتەكشى جوعارى وقۋ ورىندارى ۇزدىك ستارتاپشىلارعا ءبىلىم گرانتتارىن ۇسىندى.