تاجىكستاننان قوسىمشا 300 ملن م3 استام سۋارمالى سۋ كەلەتىن بولادى, دەپ حابارلايدى Egemen.kz.
بيىلعى جىلى سىرداريا وزەنىنىڭ باسسەينىندەگى سۋ تاپشىلىعىنا بايلانىستى كۇردەلى سۋ جاعدايى قالىپتاستى.
وسىعان بايلانىستى قازاقستان رەسپۋبليكاسىنىڭ ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ دۋشانبە قالاسىندا تاجىكستاننىڭ ەنەرگەتيكا جانە سۋ رەسۋرستارى ءمينيسترى د.دجۋمامەن كەزدەسۋ وتكىزىپ, ونىڭ بارىسىندا تاجىك تاراپىمەن «باحري توچيك» سۋ قويماسىنان بيىلعى جىلعى ماۋسىم-تامىز ارالىعىندا 315 ملن م3 سۋدى قوسىمشا اعىزۋ تۋرالى ۋاعدالاستىققا قول جەتكىزىلدى.
بۇل كولەم تۇركىستان جانە قىزىلوردا وبلىستارىندا ۆەگەتاتسيالىق كەزەڭدە سۋارمالى سۋ تاپشىلىعىن تومەندەتۋگە مۇمكىندىك بەرەدى.
«تۇركىستان جانە قىزىلوردا وبلىستارىنىڭ قاجەتتىلىكتەرى ءۇشىن سىرداريا وزەنى باسسەينىندەگى سۋ جاعدايىنىڭ قيىندىعىن ەسكەرە وتىرىپ, تاجىك تاراپى قىرعىزستان رەسپۋبليكاسى توقتوعۇل سۋ قويماسىنان اعىزاتىن سۋ كولەمىنەن باسقا, ماۋسىمنان تامىزعا دەيىن «باحري توچيك» سۋ قويماسىنان قوسىمشا 315 ملن م3 سۋ جەتكىزۋگە كەلىستى.
قازاقستان ءوز كەزەگىندە تاجىكستانعا «باحري توچيك» سۋ قويماسىنىڭ قوسىمشا جۇمىس ىستەۋىنىڭ تەرىس سالدارى تۋىنداعان جاعدايدا ماتەريالدىق-تەحنيكالىق قولداۋ كورسەتەدى», دەپ اتاپ ءوتتى ماعزۇم مىرزاعاليەۆ.