ەل تاۋەلسىزدىگىنىڭ 30 جىلدىعىنا وراي «تارازعا تارتۋ» جوباسى اياسىندا تاراز قالاسىنىڭ «قاراسۋ» الابىنان «دەنساۋلىق ساياباعى» سالىنۋدا. بۇگىندە اتالعان الاپتاعى كانالدىڭ جاعالاۋى تازارتىلىپ, قۇرىلىس جۇمىستارى قارقىندى جۇرگىزىلۋدە. ساياباقتىڭ اۋماعى بەس گەكتاردى قۇرايدى. بۇل قالا حالقىنىڭ تىنىعۋىنا, سالاماتتى ءومىر سالتىن ساقتاۋىنا قولايلى ورتالىق بولادى دەپ جوسپارلانعان.
«دەنساۋلىق ساياباعىن» ودان ءارى دامىتۋ ماقساتىندا وبلىستاعى مەديتسينا سالاسىنىڭ ارداگەرلەرى ۇيىمداسىپ, 80-نەن استام شىرشا جانە اعاش كوشەتتەرىن وتىرعىزدى. ەندى مۇندا الداعى ۋاقىتتا 1 مىڭ ءتۇپ تال كوشەتى ەگىلەتىن بولادى. وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆتىڭ ايتۋىنشا, مەديتسينا سالاسىنىڭ قىزمەتكەرلەرى وزدەرى باستاپ كوپشىلىككە كوگالداندىرىلعان ورىندا دەمالۋدى ۇسىنىپ وتىر ەكەن. ءارى بۇل ساياباق قالادا حالىق تىعىز شوعىرلانعان اۋماقتا بولعاندىقتان, دەمالۋشىلاردىڭ دا قاتارى كوپ بولاتىنى ءسوزسىز. «تازا اۋا مەن اعاشتاردىڭ ساياسىندا دەمالۋ, سونداي-اق, سالاماتتى ءومىر سالتىن ساقتاپ, سپورتپەن اينالىسۋ, جاياۋ ءجۇرۋ, دالادا تىنىس الۋ جاتتىعۋلارىن جاساۋ – بۇل تۇرعىنداردىڭ باستى ۇستانىمىنا اينالۋى قاجەت. بۇگىنگىدەي پاندەميا كەزىندە دە بۇل اسا ماڭىزدى. «اۋىرىپ ەم ىزدەگەنشە, اۋىرماۋدىڭ جولىن ىزدەۋ» كەرەكتىگىن ۇمىتپاعان ءجون. الداعى ۋاقىتتا بۇل جەر بارلىق قالا تۇرعىندارى مەن قوناقتارى دا كەلەتىن دەمالىس ورىندارىنىڭ ءبىرى بولادى دەگەن ويدامىن», دەيدى ول.
ءوڭىر دارىگەرلەرىنىڭ باستاماسىمەن قولعا الىنعان بۇل جوبا تاريحي تاراز شاھارىنىڭ ساۋلەتىن ارتتىراتىن, اسىرەسە جاس بۋىنعا سالاماتتى ءومىر سالتىن ناسيحاتتايتىن ورتالىق بولادى دەپ كۇتىلۋدە. اتالعان ساياباقتىڭ قۇرىلىسىنا بيۋدجەتتەن اقشا جۇمسالمايدى. جوبا دەمەۋشىلەر ەسەبىنەن جينالعان قاراجاتقا جۇزەگە اسىرىلىپ وتىر.
جامبىل وبلىسى