جىل باسىنان بەرى 2 مىڭنان استام اتا-اناعا بالالارىن تاربيەلەۋدەن جالتارعانى ءۇشىن ايىپپۇل سالىندى, تاعى 300-گە جۋىعى اتا-انا قۇقىقتارىنان ايىرىلدى. بۇل جايىندا ورتالىق كوممۋنيكاتسيالار قىزمەتىندە وتكەن بريفينگتە ءىىم اكىمشىلىك پوليتسيا كوميتەتى توراعاسىنىڭ ورىنباسارى الەكسەي ميليۋك ايتىپ بەردى, دەپ حابارلايدى Egemen.kz.
ونىڭ ايتۋىنشا, پوليتسيا تاۋەكەل توپتاعى كامەلەتكە تولماعاندارمەن جەكە جۇمىس جۇرگىزۋدە. ونداي 5 مىڭنان استام ادام جانە 7 مىڭ قولايسىز وتباسى ەسەپتە تۇر.
«جىل باسىنان بەرى 2 مىڭنان استام اتا-انا بالالارىن تاربيەلەۋدەن جالتارعانى ءۇشىن اكىمشىلىك جاۋاپكەرشىلىككە تارتىلدى, پوليتسيانىڭ ءوتىنىشى بويىنشا تاعى 300-گە جۋىعى سوت شەشىمىمەن اتا-انا قۇقىعىنان ايىرىلدى. ايتا كەتەيىن, جاسوسپىرىمدەردىڭ تۇنگى ۋاقىتتا زاڭدى وكىلدەرىنسىز تۇرعىنجايدان تىس جۇرگەنى نەمەسە ويىن-ساۋىق ورىندارىندا بولعانى ءۇشىن اكىمشىلىك جاۋاپكەرشىلىك بەلگىلەنگەن. مۇنداي بۇزۋشىلىقتار ءۇشىن مەكەمە يەلەرى مەن كامەلەتكە تولماعانداردىڭ اتا-انالارى جازالانادى», دەدى ءىىم وكىلى.
باپتار بويىنشا اتا–انالارعا ەسكەرتۋ جاساۋ, كاسىپكەرلىك سۋبەكتىلەرگە 9 مىڭ تەڭگە مولشەرىندە ايىپپۇل سالۋ قاراستىرىلعان. قۇقىق بۇزۋشىلىق قايتالانعان جاعدايدا ايىپپۇل 21 مىڭ تەڭگەگە دەيىن ارتادى.
«سونىمەن قاتار 1,5 مىڭعا جۋىق ءجاسوسپىرىم كامەلەتكە تولماعانداردى بەيىمدەۋ ورتالىقتارىنا ورنالاستىرىلدى. پوليتسيا جاسوسپىرىمدەرگە الكوگول مەن تەمەكى ونىمدەرىن زاڭسىز ساتۋ فاكتىلەرىن انىقتاۋ باعىتىندا جۇمىستار جۇرگىزۋدە», دەپ تولىقتىردى پولكوۆنيك.