قوستاناي وبلىسىندا تۇڭعىش رەت مەيماندارعا تەك قازاقتىڭ ۇلتتىق تاعام تۇرلەرىن عانا ۇسىناتىن ەتنودامحانا جۇمىس ىستەي باستادى. رۋدنىيداعى «قىز جىبەك» ەتنودامحاناسىنا باس سۇعا قالساڭىز, ءدامحانا داستارقانىنان مولىنان اسىلعان ەت پەن قۋىرداققا تويىپ, سۇزبە ارالاستىرعان ىستىق سورپامەن اس تارقاتىپ, باۋىرساق, قۇرت, ىرىمشىك, قىمىز, شۇبات سياقتى تاڭسىق اس-سۋسىننان قالاۋىڭىزشا ءدام تاتىپ شىعاسىز.
ەتنودامحانانى رۋدنىيدىڭ ماڭىنداعى يۋبيلەينىي اۋىلىندا ويسىلقارا ءتولىن ءوسىرىپ وتىرعان نۇرماحانوۆتار وتباسى اشتى. وتاعاسى المات وسىدان 5 جىل بۇرىن مەملەكەتتىڭ كاسىپكەرلىكتى قولداۋعا ارنالعان باعدارلاماسىن ءتيىمدى پايدالانىپ, تۇيە فەرماسىن اشقان. ەندى, مىنە, بيىل كۇن جىلىنىسىمەن قالانىڭ ءبىر شەتىنەن اقشاڭقان كيىزۇي تىگىپ, ءدامحاناسىن ىسكە قوستى.
سارىباي-سوكولوۆ كەن وندىرىسىندە 15 جىل جۇمىس ىستەگەن المات نۇرماحانوۆ 2016 جىلى وبلىستىق كاسىپكەرلەر پالاتاسىنىڭ جانىنان اشىلعان «باستاۋ بيزنەس» كۋرسىن تامامداعان سوڭ, جەڭىلدەتىلگەن نەسيە الىپ, 5 تۇيە ساتىپ الدى. وڭىردە كەنجەلەپ قالعان اتاكاسىپتى مىقتاپ قولعا العان المات ەكى جىل وتكەن سوڭ, «اتامەكەن-قوستاناي» قارجى ورتالىعىنان جەڭىلدىكپەن تاعى 5 ملن تەڭگە نەسيە الىپ, ەت پەن تۇيە ءجۇنىن ساتا باستادى. وسىلايشا, تۇيە سانىن وتىزعا دەيىن جەتكىزدى. كاسىپكەر مۇنىمەن توقتاپ قالماي, سوڭعى ءبىر-ەكى جىل ىشىندە تۋريزم باعىتىن دامىتۋدى قولعا الىپ وتىر. ادەتتە, التى ايلىق قىسىنىڭ قىتىمىر مىنەزىنەن بە, ايتەۋىر توبىل وڭىرىندە كوپشىلىك جۇرت تۇيە ۇستاي قويمايدى. سوندىقتان ويسىلقارا تۇقىمىن بۇل ءوڭىردىڭ تۇرعىندارى تاڭسىق كورەدى. مۇنى جاقسى بىلەتىن المات ءوزىنىڭ تۇيە فەرماسىنا ەكسكۋرسيالار ۇيىمداستىرىپ, بالالاردى تۇيەگە مىنگىزىپ, فوتوسۋرەتكە ءتۇسىرىپ, قىزىقتاپ كەلۋشىلەردى تۇيە باعۋدىڭ قىر-سىرىمەن تانىستىرا باستادى.
– تۇيە جانۋارىنا دەگەن ەلدىڭ ەرەكشە ىقىلاسىن بايقاعان سوڭ, ۇيدەگى جۇبايىمىز ەكەۋىمىز كيىز ءۇي تىگىپ, ءىشىن ءسان-سالتاناتقا تولتىرىپ, كەلگەن ادامدى ۇلتتىق تاعاممەن عانا تاماقتاندىراتىن ءدامحانا اشساق قالاي بولادى دەگەن ويعا كەلدىك. ونىڭ ۇستىنە, ءبىزدىڭ وڭىردە ءدال مۇنداي ءدامحانانى ەشبىر جەردەن تابا المايسىز. بيىل وسى ويىمىزدى ىسكە اسىردىق. كيىز ءۇي وزىمىزدىكى, باياعىدا وزبەكستاننان كوشىپ كەلگەندە, وزىمىزبەن بىرگە الىپ كەلگەنبىز. ودان كەيىن ساتىپ جىبەرىپ ەدىك, ءوز ءۇيىمىزدى ءوزىمىز قايتا ساتىپ الىپ, قۋانىپ جاتىرمىز. كافەنىڭ اتاۋىن جۇبايىم «قىز جىبەك» دەپ قويدى. تاعامدى نەگىزىنەن ءوزى دايىندايدى, جانىندا ءبىر-ەكى كومەكشىسى بار, – دەدى ا.نۇرماحانوۆ.
كاسىپكەردىڭ ايتۋىنشا, قازىر ۋاقىت قاتاڭ تالاپ قويىپ وتىر. سوندىقتان ەتنودامحانا بىردەن Ashyq جوباسىنا تىركەلىپتى.
– قازىر بيلىك پەن حالىق, ودان كەيىن كاسىپكەرلەر بار, وسىلاردىڭ ارقايسىسى ءار جاققا بۇرا تارتپاي, ىندەتكە قارسى بىرلەسە كۇرەس جۇرگىزگەندە عانا بۇل ناۋبەتتى جەڭە الامىز. قالىپتى ومىرگە كىمنىڭ تەزىرەك ورالعىسى كەلمەيدى؟ ءبىز ءالى تالاي دۇنيەنى جۇزەگە اسىرامىز با دەپ جوسپارلاپ وتىرمىز. قازىر مال باسى كوبەيىپ, جەر تارشىلىعىن سەزىنە باستادىق. فەرماعا قىزىق كورىپ كەلگەن مەيماندارعا شارۋاشىلىقتى ارالاتىپ, كورسەتۋدىڭ ءوزى قولايسىز. الداعى ۋاقىتتا مۇندا قوناقتار تۇيەگە ءمىنىپ, كيىز ۇيگە جاتىپ تىنىعاتىنداي تۋريستىك ورتالىق اشامىز با دەگەن جوسپارىمىز بار, – دەدى كاسىپكەر.
قوستاناي وبلىسى,
رۋدنىي قالاسى