ايماقتا قۇقىقبۇزۋشىلىق پەن قىلمىستىڭ الدىن الۋ, سونداي-اق كامەلەتكە تولماعانداردى قىلمىستىق ورتاعا تارتۋدى بولدىرماۋ ماقساتىندا اعىمداعى جىلدىڭ 25 مامىرىندا جامبىل وبلىسىنىڭ بارلىق مەكتەپتەرىندە «سوڭعى قوڭىراۋ» مەرەكەسىنە ارنالعان ءىس-شارالار كەزىندە پوليتسيا قىزمەتكەرلەرى جاستار كوپ جينالاتىن ورىنداردا پاترۋلدىك قىزمەت جاساقتارىنىڭ تىعىزدىعىن كۇشەيتكەن بولاتىن, دەپ حابارلايدى Egemen.kz.
سونىمەن قاتار شومىلۋ ورىندارى دا باقىلاۋعا الىندى. قوعامدىق ءتارتىپتى بۇزۋدى, ونىڭ ىشىندە مەكتەپ وقۋشىلارىنىڭ قاتىسۋىمەن ورىن الۋى مۇمكىن جول-كولىك وقيعالارىنىڭ الدىن الۋعا قاتىستى جاعدايدى باقىلاۋ ماقساتىندا قۇرامىندا وبلىستىق پوليتسيا دەپارتامەنتىنىڭ جەرگىلىكتى پوليتسيا قىزمەتى باسقارماسى, قالالىق جانە اۋداندىق پوليتسيا بولىمدەرىنىڭ باسشىلارى بار جەدەل شتابتار قۇرىلدى.
«كافەلەر مەن مەيرامحانالاردا مەكتەپ ءبىتىرۋ كەشىن تويلاۋعا نەمەسە شاقىرىلعاندار كوپ جينالاتىن وسىنداي ءىس-شارالاردى وتكىزۋگە تىيىم سالىنادى. تاراز قالاسىنىڭ قىزىل ايماقتا ەكەندىگىن ۇمىتپاۋىمىز كەرەك. وسىعان بايلانىستى بارلىق ويىن-ساۋىق ورىندارى قۇقىق قورعاۋ ورگاندارىنىڭ ءجىتى نازارىندا بولادى», دەيدى وبلىستىق پوليتسيا دەپارتامەنتى جەرگىلىكتى پوليتسيا قىزمەتى باسقارماسى يۋۆەنالدى پوليتسيا توبىنىڭ ەرەكشە تاپسىرمالار جونىندەگى اعا ينسپەكتورى, پوليتسيا پولكوۆنيگى قۋانىشبەك قالجانوۆ.
الايدا, ءموبيلدى توپتار جۇرگىزگەن رەيد بارىسىندا ىشكى ىستەر ورگاندارىنا كامەلەتكە تولماعان 72 بالا جەتكىزىلدى. سونىمەن قاتار 76 اتا-انا مەن وزگە دە زاڭدى وكىلدەر اكىمشىلىك جاۋاپكەرشىلىككە تارتىلدى.
«كامەلەتكە تولماعانداردىڭ تۇنگى ۋاقىتتا ويىن-ساۋىق مەكەمەلەرىندە بولعانى ءۇشىن ەكى كافە-باردىڭ يەسى جاۋاپكەرشىلىككە تارتىلدى. دۇكەننىڭ ەكى يەسى الكوگول ونىمدەرىن ساتۋ ەرەجەلەرى تۋرالى قازاقستان رەسپۋبليكاسىنىڭ زاڭناماسىن بۇزعانى ءۇشىن, 71 اتا-انا كامەلەتكە تولماعان بالالارىنىڭ تۇنگى ۋاقىتتا ويىن-ساۋىق مەكەمەلەرىندە جانە تۇرعىن ۇيدەن تىس جەردە بولعانى ءۇشىن اكىمشىلىك جاۋاپكەرشىلىككە تارتىلدى. اتا-انالىق مىندەتتەرىن تيىسىنشە ورىنداماۋدىڭ 1 دەرەگى انىقتالدى. تۇتاستاي العاندا, وبلىس بويىنشا ءىس-شارالار وتكىزۋ بارىسىندا توتەنشە جاعدايلار ورىن العان جوق. كامەلەتكە تولماعانداردى زاڭسىز ارەكەتتەرگە تارتۋ دەرەكتەرى انىقتالمادى», دەيدى قۋانىشبەك قالجانوۆ.
جامبىل وبلىسى