لاتۆيا استاناسى – ريگادا ءوتىپ جاتقان شايبالى حوككەيدەن الەم چەمپيوناتىنىڭ توپتىق كەزەڭىندەگى ويىندار بەل ورتاسىنا جاقىندادى. ءۇشىنشى تۋر باسەكەلەرىنىڭ قورىتىندىسى بويىنشا, ازىرگە ەكى توپتا ءبىر-ءبىر قۇراما جەڭىلىستىڭ نە ەكەنىن بىلمەي كەلە جاتقان. قازاقستان حوككەيشىلەرى دە جەڭىستى جولىن جالعاستىرا الماعان-تىن. بىراق كەلەسى كەزدەسۋىندە جەڭىلىسسىز كەلە جاتقان گەرمانيانى 3:2 ەسەبىمەن تىزە بۇكتىردى, دەپ حابارلايدى Egemen.kz.
جەرلەستەرىمىز ءۇشىنشى تۋردا ازۋلى اقش قۇراماسىمەن شەبەرلىك بايقاستى. الەمدىك رەيتينگتە التىنشى ورىندا تۇرعان امەريكا حوككەيشىلەرى العاشقى تۋردا فينلياندياعا 1:2 ەسەبىمەن ەسە جىبەرگەننەن كەيىن, ەكىنشى تۋردا كانادا قۇراماسىن ءىرى ەسەپپەن جەڭدى – 5:1. ءار تۋر سايىن ويىندارى قارقىن الىپ كەلە جاتقان سولتۇستىك امەريكا وكىلدەرى ءۇشىنشى تۋردا قازاقستان قۇراماسىنىڭ قاقپاسىنا جاۋاپسىز ءۇش شايبا سوقتى.
قازاقستان قۇراماسىنىڭ الەم بىرىنشىلىگىندەگى وتكەن ەكى ويىنىمەن سالىستىرعاندا, يۋري ميحايليس اقش-قا قارسى وتكەن ماتچتا قۇرامعا ازداعان وزگەرىس ەنگىزگەنىن بايقادىق. ماسەلەن, بۇعان دەيىنگى كەزدەسۋلەردە العاشقى بەستىكتە ويناعان شابۋىلشىلار الەكساندر شين مەن ەۆگەني رىمارەۆتىڭ ورنىنا رومان ستارچەنكومەن بىرگە كيريلل پانيۋكوۆ جانە دميتري شەۆچەنكو شىقتى. سونىمەن قاتار ءبىر ويىنعا ايىپتالعان قورعاۋشى ۆيكتور سۆەدبەرگتى ۆالەري ورەحوۆ الماستىردى. بۇل ۆ.ورەحوۆتىڭ الەم بىرىنشىلىگىندەگى العاشقى ماتچى بولدى.
اقش حوككەيشىلەرى ويىن باستالعان ساتتەن باستاپ تىزگىندى ءوز قولدارىنا الىپ, كەزدەسۋدىڭ 7-مينۋتىندا ەسەپتى اشتى. گولدىڭ اۆتورى – ادام كلەندەنينگ. گولدان كەيىن دە امەريكالىقتار بوياركين قورعاعان قاقپانىڭ ماڭايىن ءبىراز تورۋىلداعانىمەن, قازاقستاندىق قاقپاشى شايبا سوعۋعا مۇمكىندىك بەرگەن جوق. ءبىرىنشى كەزەڭدە امەريكالىقتار ءبىزدىڭ قاقپاعا 25 (!) سوققى جاسادى. ونىڭ تەك بىرەۋى عانا گولعا اينالدى. ال قازاقستان حوككەيشىلەرى ءبىرىنشى كەزەڭدە 8 مارتە سوققى جاسادى.
ەكىنشى كەزەڭدە دە بەلسەندى بولعان قارسىلاستار 22-مينۋتتا ەسەپتى 2:0-گە جەتكىزدى. بۇل جولى 26 جاستاعى «لوس-اندجەلەس» كلۋبىنىڭ شابۋىلشىسى ترەۆور مۋر كوزگە ءتۇستى. بۇعان دەيىنگى ويىنداردا كوبىنە سان باسىمدىعىنا يە بولعان ساتتەردە دە گول سوعاتىن قازاقستان قۇراماسى اقش-پەن وتكەن ويىندا مۇنداي مۇمكىندىكتەرىن پايدالانا المادى.
ءۇشىنشى كەزەڭدە دە امەريكالىقتار ويىن باستالعان ساتتە گول سوعىپ كەتتى. 42-مينۋتتا رايان دوناتو مەن مەتت تەننيسوننان پاس العان دجەك درۋري مۇزايدىننىڭ ورتا تۇسىندا ورنالاسقان كوك سىزىقتان ءبىزدىڭ قاقپاعا گول سوعىپ كەتتى. قازاقستاندىق حوككەيشىلەر ماتچ سوڭىنا دەيىن ەسەپ ايىرماسىن قىسقارتۋعا تىرىسقانىمەن, بۇل ويىندا وتانداستارىمىزعا گول سوعۋ باقىتى بۇيىرمادى. قورىتىندى ەسەپ 3:0 اقش-تىڭ پايداسىنا.
وسىلايشا, قازاقستان قۇراماسى الەم چەمپيوناتىنداعى العاشقى جەڭىلىسىنە ۇشىرادى. ماتچتان سوڭ قازاقستان ۇلتتىق قۇراماسىنىڭ باس باپكەرى يۋري ميحايليس ويىنعا قاتىستى ءوز پىكىرىن ءبىلدىردى. «اقش سەكىلدى ازۋلى كومانداعا قارسى ويناۋ ءبىز ءۇشىن ۇلكەن تاجىريبە بولدى. كەيبىر ساتتەردە ءبىز شابۋىلدان قورعانىسقا, قورعانىستان شابۋىلعا شىعۋعا ۇلگەرمەي جاتتىق. قارسىلاستارىمىزعا كەزدەسۋدىڭ باسىم بولىگىن ءوز ايماعىمىزدا وتكىزۋگە مۇمكىندىك بەرىپ قويدىق. ءبىزدىڭ كوماندادا دا گول سوعاتىن بىرنەشە مۇمكىندىك بولعانىمەن, ونى جۇزەگە اسىرا المادىق. قارسىلاس كوماندانىڭ ويىنى بىزگە ساباق بولدى. كەلەسى كەزدەسۋلەردە قاتەلىكتەرىمىزدى تۇزەۋگە تىرىسامىز», دەدى يۋري ميحايليس.
باس باپكەر سوزىندە تۇردى. گەرمانيامەن بولعان ءتورتىنشى تۋر ويىنىندا قازاقستان قۇراماسى تاباندىلىق تانىتىپ, كەزدەسۋ سوڭىنا قاراي جەڭىستى قارسىلاستارىنان جۇلىپ اكەتتى. گولداردىڭ اۆتورلارى – الەكساندر شين, رومان ستارچەنكو جانە پاۆەل اكولزين.
نەمىستەر ويىن ەسەبىن وزگەرتۋگە قانشا كۇش سالعاندارىمەن, ولارىنان ناتيجە شىقپادى.