«چەلسيدىڭ» چەمپيوندىق قۇرامى قازىر قايدا ءجۇر؟

پەپ گۆارديوللا جاتتىقتىراتىن كلۋب ءوز تاريحىندا تۇڭعىش رەت بۇل مارتەبەلى ءتۋرنيردىڭ ءفيناليسى اتانىپ وتىرسا, «چەلسي» ەكىنشى مارتە چەمپيون اتانۋ مۇمكىندىگىنە يە. لوندوندىق ۇجىم العاش رەت فينالعا 2008 جىلى شىعىپ, جەڭە المادى. ەكىنشى رەت 2012 جىلى شىعىپ, دراماعا تولى ماتچتا ميۋنحەندىك «باۆاريادان» باسىم ءتۇستى. سول جولعى جەڭىمپاز «چەلسي» ويىنشىلارى قازىر قايدا؟ سول كەزدەگى قۇرامنان كلۋبتا كىم قالدى؟ وسى سۇراقتارعا جاۋاپ ىزدەيىك.قاقپانى قورعاعان پەتر چەح ول كەزدە 30 جاستا بولاتىن. قازىر 39-دا. فۋت­بولدان ءالى الىستاعان جوق. «چەل­سيدىڭ» 23 جاسقا دەيىنگى جاستار كومانداسىندا وي­نايدى.

جوزە بوزينگۆا. پورتۋگاليا فۋتبول­شىسى ول كەزدە 30 جاستا ەدى. قازىر 39-دا. 2012 جىلى كلۋبتان كەتىپ, 2012-2013 جىل­دارى «كۋينز پارك رەيندجەرس» كو­مان­­داسىندا, 2013-2016 جىلدارى «ترابزونسپوردا» وينادى. ودان كەيىن فۋت­بول­شى تۋرالى ەشقانداي اقپارات جاريا­لانعان جوق.

چەمپيوندار ليگاسىندا جەڭگەن كەزدە 25 جاستا بولعان قورعاۋشى داۆيد لۋيز قازىر لوندوننىڭ «ارسەنالىنىڭ» نامىسىن قورعاپ ءجۇر.

گاري كەحيلل. قوس قۇلاقتى كۋبوكتى جەڭگەن كەزدە 27 جاستا ەدى. قازىر 36-دا. «چەلسيدە» 2012-2019 جىلدار ارالى­عىن­دا ويناپ, كلۋبتىڭ اڭىزىنا اينالدى. 2019 جىلى «كريستال پەلاسپەن» كەلى­سىمشارتقا وتىردى.

ەشلي كوۋل. 41 جاستاعى ەكس-قورعاۋشى 2014 جىلى كلۋبتان كەتكەن سوڭ «روما», «لوس-اندجەلەس گەلاكسي», «دەربي كاۋن­تي» كوماندالارىنىڭ نامىسىن قورعادى. 2019 جىلدىڭ جازىندا مانسابىن اياق­تاعانىن مالىمدەدى.

دجون وبي ميكەل. 2020 جىلدىڭ 17 تامىزىندا «چەلسيدەن» ەركىن اگەنت رە­تىندە كەتىپ, «ستوك سيتي» كلۋبىمەن كەلىسىم­شارتقا وتىردى.

فرەنك لەمپارد. «چەلسي» تاريحىنداعى ەڭ ۇزدىك بومباردير (211 گول). «چەلسيدەن» كەتكەننەن كەيىن ءبىر-ءبىر ماۋسىمنان «مان­چەستەر سيتي», «نيۋ يورك سيتي» كلۋبتارىندا وينادى. 2019-2021 جىلدارى «چەلسيدىڭ» باس باپكەرى بولىپ جۇمىس ىستەدى. الايدا باپكەر رەتىندەگى ناتيجەسى باسشىلىققا ۇناماي, ونىڭ ورنىنا نەمىس مامانى توماس تۋحەل كەلدى.

سالومون كالۋ. چل-دى جەڭىپ العان سوڭ ىلە-شالا كلۋبتان كەتكەن ويىنشىلاردىڭ ءبىرى. ودان سوڭ «ليلل», «گەرتا» كوماندالارىندا وينادى. قازىر برازيليالىق «بوتوفاگو» ويىنشىسى. 25 ويىندا 1 گول سوققان.

حۋان ماتا. «چەلسي» ساپىندا ەرەكشە ما­ڭىزعا يە بولا الماعان فۋتبولشى 2014 جىلدان بەرى «مانچەستەر يۋنايتەد» ساپىندا ويناپ ءجۇر.

رايان بەرتراند. اعىلشىن ويىنشىسى چل-دى ۇتقان جىلى 23-تە بولدى. قازىر 32 جاستا. 2014 جىلى «استون ۆيللا» ساپىنا اۋىستى. 2015 جىلى اق­پان­نان باستاپ «ساۋتگەمپتون» ويىنشىسى اتاندى.

ديدە دروگبا. 34 جاسىندا «چەلسيمەن» بىرگە چەمپيوندار ليگاسىن جەڭىپ العان يۆۋارلىق اڭىز فۋتبولشى «چەلسيدەن» كەيىن كانادانىڭ «مونرەال يمپاكت», امەريكانىڭ «فينيكس رايزينگ» كوماندالارىنا باردى. 40 جاسىندا كارەراسىن اياقتادى. قازىر «فينيكس رايزينگ» كلۋبىنىڭ يەسى.

پاۋلۋ فەررەيرا. 2013 جىلى «چەلسي» ساپىنداعى سوڭعى ماۋسىمىن وتكىزىپ, كاسىبي كارەراسىن اياقتادى.

مايكل ەسسەن. وتىزىندا وردا بۇ­زىپ چل-دى جەڭىپ الدى. قازىر 39 جاستا. 2005-2014 جىلدار ارالىعىندا «چەل­سيدە» 168 كەزدەسۋگە قاتىسىپ, 17 گول سوققان. بۇل ارالىقتا «رەالدا» دا ويناپ كەلدى. كەيىن «ميلانعا», گرەكيالىق «پانا­تينايكوسقا», «پەرسيب باندۋنگ» كوماندالارىنا اۋىس­تى. كاسىبي مانسابىن ازەربايجاندىق «سابايل» كلۋبىندا ءتامامدادى.

وريول رومەۋ. يسپان فۋتبولشىسى چل-دى ۇتقان كەزدە 21-دە ەدى. قازىر 30-دا. كەلەشەگىنەن كوپ ءۇمىت كۇتتىرگەن جارتىلاي قورعاۋشىنىڭ كەيىنگى تاعدىرى توپ-كلۋبتارمەن بايلانىستى بولعان جوق. «چەلسيدە» وتكىزگەن ءتورت ماۋسىمنان كەيىن «ۆا­لەنسيا», «شتۋتگارت» كلۋبتارىنا باردى. 2015 جىلى «ساۋتگەمپتونمەن» ءۇش جىلدىق كەلىسىمگە وتىردى. اعىلشىن چەمپيوناتىندا ويناعانىنا قاراماستان, سول كۇيى يسپانيا ۇلتتىق قۇراماسىنا ىلىنە المادى.

فلوران مالۋدا. 2006 جىلى فرانتسيا قۇراماسىمەن الەم چەمپيونى اتانعان ول «چەلسيگە» كەلە سالىسىمەن ارەن روب­بەندى نەگىزگى قۇرامنان ىعىستىردى. وسى­­عان قاراپ ونىڭ قانشالىقتى بەرىك وي­ىنشى ەكەنىن اڭعارۋعا بولادى. 2013 جىلى «ترابزونسپورعا» اۋىس­تى. تۇرىك كلۋبىنداعى مانسابى ۇزاققا سوزىل­­­ماي, 2018 جىلى ليۋكسەمبۋرگتىڭ «ديففەردانج» كومانداسىنىڭ ساپىنا كەتتى.

دەنيەل ستارريدج. انگليانىڭ اسا كوپ ءۇمىت كۇتكەن فۋتبولشىسى. ەڭ جۇلدىزدى ءساتى «ليۆەرپۋلدە» ءوتتى. 116 ويىندا 51 گول سوقتى. ودان سوڭ «ۆەست برومۆيچكە», «ترابزونسپورعا» اۋىستى. قازىر ەشقانداي كلۋب ساپىندا ەمەس.

فەرناندو توررەس. 2011-2015 جىلدار ارالىعىندا لوندوندىق ۇجىمدا ويناپ, 2018-2019 جىلداردا جاپونيانىڭ «ساگان توسۋ» ساپىنا اۋىستى. 2021 جىلدان باس­تاپ «اتلەتيكو مادريد ب» كومانداسىن جاتتىقتىرادى.

روبەرتو دي ماتتەو. 42 جاسىندا باس باپكەر رەتىندە چل-دى ۇتقان ول كەز كەل­­گەن باپكەر ارماندايتىن وسى ءبىر باقىت­تى ساتكە كەزدەيسوق قول جەتكىزدى. 2011 جىلى باس باپكەر اندرە ۆيللاش-بواش­تىڭ كومەكشىسى بولىپ جۇمىسقا تۇر­عان. الايدا كوپ ۇزاماي ۆيللاش-بواش قىزمەت­تەن كەتىپ, دي ماتتەو كوماندانى ۋاقىت­شا قولعا الادى. 2012 جىلى 5 مامىردا انگليا كۋبوگىن, ەكى اپتا وتكەن سوڭ چەمپيوندار ليگاسىن جەڭىپ الدى. قارا­شادا كلۋب باسشىلىعى دي ماتتەونى جۇ­مىستان بوساتتى. ودان كەيىن «شالكە», «اس­تون ۆيللا» كلۋبتارىن جاتتىقتىردى. بى­راق ايتارلىقتاي جەتىستىككە جەتە المادى.

فينال جايلى بىرەر ءسوز. 2020/2021 جىلعى چەمپيوندار ليگاسىنىڭ فينالى 29 مامىر كۇنى پورتۋگالياداعى «درا­گاۋ» ستاديونىندا وتەدى. فينالعا يسپان تورەشىسى انتونيو ماتەۋ لاوس قازىلىق جاسايدى. ماتچتى ستاديوننان ءار كوماندادان 6 مىڭ جانكۇيەر عانا كەلىپ, تاماشالاي الادى. ايتپاقشى, 2012 جىلعى جەڭىمپاز قۇرامنان ءدال قازىر «چەلسي» ساپىندا ەشكىم جوق. تەك اندرەاس كريستەنسەندى ايتۋعا بولادى. ول 2012 جىلى اقپان ايىندا كلۋبپەن كەلىسىمشارتقا وتىردى. بىراق باس باپكەر ۆيللاش-بواشتىڭ سەنىمىنە يە بولا العان جوق. باس كومانداداعى رەسمي ماتچىن تەك 2014 جىلى عانا وتكىزدى.