پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ ەڭبەك كودەكسىنە قاشىقتان جۇمىس ىستەۋدى قۇقىقتىق رەتتەۋدى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكىنشى وقىلىمدا ماقۇلداندى, دەپ حابارلايدى Egemen.kz.
زاڭ جوباسىنا قازاقستان رەسپۋبليكاسى پارلامەنتىنىڭ دەپۋتاتتارى قاشىقتان جۇمىس ىستەۋگە بايلانىستى ەڭبەك قاتىناستارىن رەتتەۋ ماقساتىندا باستاماشى بولدى جانە 2021 جىلعى 8 اقپاندا قازاقستان رەسپۋبليكاسى پارلامەنتى ءماجىلىسىنىڭ قاراۋىنا ەنگىزىلدى.
ءماجىلىستىڭ الەۋمەتتىك-مادەني دامۋ كوميتەتىنىڭ مالىمەتىنشە, دەپۋتاتتار زاڭ جوباسىمەن جۇمىس ىستەۋ بارىسىندا:
- جۇمىسكەرلەردىڭ سايلانبالى وكىلدەرىن, ونىڭ ىشىندە قاشىقتان داۋىس بەرۋدى پايدالانۋ مۇمكىندىگىن ەسكەرە وتىرىپ سايلاۋ جانە ولارعا وكىلەتتىكتەر بەرۋ ءتارتىبى بەكىتىلدى;
- ءتۇسىندىرۋ حابارلامالارىن دايىنداۋ كەزىندە قاعاز نىسانداعى قۇجاتتارمەن قاتار ەلەكتروندىق تسيفرلىق قولتاڭبامەن كۋالاندىرىلعان ەلەكتروندىق قۇجاتتى پايدالانۋ مۇمكىندىگى كوزدەلگەن;
- قاشىقتان جۇمىس ىستەپ جۇرگەن جۇمىسكەردى ىسساپارعا جىبەرۋگە قاتىستى نورمالار ناقتىلاندى. ەڭبەك كودەكسىنىڭ قاشىقتان جۇمىس ىستەۋدى رەتتەيتىن 138-بابىنا نورمالار قايتا قارالدى. ماسەلەن, قاشىقتان جۇمىس, قاشىقتان ارالاس جۇمىس تاراپتاردىڭ كەلىسىمى بويىنشا جۇمىسكەردىڭ نەمەسە جۇمىس بەرۋشىنىڭ باستاماسى بويىنشا بەلگىلەنۋى مۇمكىن.
«بۇل رەتتە جۇمىس بەرۋشى جۇمىسكەردى ەڭبەك مىندەتتەرىن ورىنداۋ ءۇشىن قاجەتتى جابدىقپەن, قازاقستان رەسپۋبليكاسىنىڭ اقپاراتتاندىرۋ تۋرالى زاڭناماسىنا سايكەس اقپاراتتاندىرۋ وبەكتىلەرىمەن, بايلانىس قىزمەتتەرىمەن جانە وزگە دە قۇرالدارمەن قامتاماسىز ەتەدى. جۇمىسكەردىڭ جۇمىس كۇنىنىڭ كۇندەلىكتى ۇزاقتىعىنىڭ شەكتەۋلەرىن ساقتاي وتىرىپ, جۇمىس ۋاقىتى شەگىندە جۇمىس بەرۋشىمەن بايلانىس ءۇشىن قولجەتىمدىلىك رەجيمىندە بولۋ ماسەلەلەرى رەتتەلدى. بۇل رەتتە ەڭبەك كودەكسىندە كوزدەلگەن جەكەلەگەن جاعدايلاردى قوسپاعاندا, جۇمىس بەرۋشىنىڭ جۇمىسكەردىڭ جۇمىس ۋاقىتىنان تىس قولجەتىمدىلىك رەجيمىندە بولۋىن تالاپ ەتۋگە قۇقىعى جوق», دەلىنگەن كوميتەت قورىتىندىسىندا.