ۋاقىت تەگەرشىگى قوزعالعان ساتتەن بەرى ءار كەزەڭنىڭ ءوز جازۋشىسى, ءوز تاريحشىسى بار دەپ بىلەمىز. ياعني كەز كەلگەن قوعامنىڭ پسيحولوگياسىن ءوز سۋرەتكەرى باياندايدى. ال قازىرگى قازاق ءومىرى كوركەم شىعارمادا قالاي بەينەلەپ ءجۇر؟ ادەبي ساۋالدامامىزدىڭ كەزەكتى قوناقتارى – ادەبيەتىمىزدىڭ جاس بۋىن وكىلدەرى.
باۋىرجان يگىلىك, اقىن:
«نە جازسام؟» دەگەن سۇراقتان قاشىپ, ۇنەمى قوزعالىستا جۇرۋگە تىرىسامىن. وقۋ, ىزدەنۋ, ارينە ءوز الدىنا مىندەتتى شارۋا. الايدا مەن ءۇشىن جول ءجۇرىپ, تاڭسىق جەر مەن تانىمايتىن ورتادان اڭگىمە تىڭداۋ ماڭىزدى. ساپار بارىسىندا كوپتەگەن تاعدىر يەلەرىمەن سۇحباتتاسۋ مۇمكىندىگى تۋادى. مىسالى, قازىر پويىزدا ومىرىنەن سىر شەرتكەن كەيۋانانىڭ پەشەنەسى تولعانتىپ, كەزەكتى ءبىر باللادانىڭ جەتەگىندە ءجۇرمىن... نە جازسام دا, ەڭ باستىسى, شىنايى بولۋىن قالايمىن. جاڭالىق اشىپ, باتىستىڭ ءستيلىن اكەلۋ, شىعىستىڭ سارىنىن قوسۋ ماقساتىمدا جوق. ادام پسيحولوگياسى, تاعدىر جولى قاتتى قىزىقتىرادى. جازام دەگەن ادام تاقىرىپتان تارلىق كورمەس, سەبەبى ءومىردىڭ ءوزى جازمىشتار گالەرەياسى.ءۇڭىل دە جىرلا!
الىشەر راحات, جازۋشى:
– «پاراللەل» اتتى رومان جازىپ جاتىرمىن. وسىمەن, شاتاسپاسام, ون ءۇشىنشى رەت باستادىم. ون-جيىرما شاقتى بەت جازامىن دا, توقتاپ قالا بەرەمىن. ەندىگىسىن سوڭعى نۇسقا شىعار دەپ ويلايمىن. جازا الماي, توقتاپ قالاتىنىم كارانتيننىڭ اسەرى مە دەيمىن. ويتكەنى ۆەلوسيپەدتى ايداۋ ءۇشىن العا ءجۇرۋ قالاي ماڭىزدى بولسا, ومىردە ءبىر ورىندا تۇرىپ قالعاننىڭ دا شىعارماشىلىققا اسەرى سونداي بولار. بىراق ەندى-ەندى تىرشىلىگىمىز قالىپقا كەلىپ, قالامەن بىرگە تىنىسىمىز دا اشىلىپ جاتقانداي.
«پاراللەل» – مەنىڭ العاشقى رومانىم «ماحابباتىم – constant» سەكىلدى ماحاببات تاقىرىبىن قوزعايدى. وقيعا الماتى قالاسىندا وتەدى. ادامنىڭ ىشكى الەمىندەگى وزگەرىستەر سىرتقا قانداي فورمادا شىعاتىنى جايلى جانە ءولىم الدىنداعى ادامنىڭ جانتالاسى سۋرەتتەلەدى.
بەرىكبول باتان, جازۋشى:
– ەگەر يدەيانى قورىتىپ, ويشا دامىتىپ ءارى ءبىرىنشى رومانداعى جەتپەگەنى مەن كەتكەن قاتەلىكتەرىن قايتا زەرتتەپ ءجۇرۋ جازۋ پروتسەسىنە كىرەتىن بولسا, العاشقى كەزەڭىندە ءجۇرمىن دەپ ايتۋعا بولاتىن شىعار. سەبەبى جازۋعا دەگەن موتيۆاتسيامەن قولدى, ويدى ۇستايتىن كەدەرگىلەردىڭ ءبارى سول ءبىرىنشى كىتاپتىڭ پراكتيكاسىنان پايدا بولادى ەكەن. ودان بولەك جالپى قوعامدىق دەڭگەيدەگى دەپرەسسيالىق كوڭىل كۇي دە اسەر ەتەتىن سىڭايلى. ەكىنشى شىعارما دا شىتىرمان وقيعاعا تولى رومان بولادى, سوندىقتان ەڭ باستىسى, جازعىم كەلگەن تاقىرىپتىڭ ءبارىن تولىق زەرتتەۋىم كەرەك.
ال تاقىرىبىن ءالى قويعان جوقپىن. وقيعادا ءوز يدەيالارىنىڭ جولىندا ءبارىن قۇربان ەتۋگە دايىن جانداردىڭ ءومىرى باياندالادى. ارينە, ءبىرىنشى رومانداعى كەيىپكەرلەرىمدە ءوز ماقساتتارىنىڭ سوڭىنا تۇسكەندەر ەدى. بۇل جولى ايىرماشىلىق جانرلىق تۇرعىدان عانا بولادى. رەاليزمدى جازعىم كەلەدى. ياعني ۋاقىتپەن كەڭىستىك قازىرگى ءساتتى قامتيدى.
دايىنداعان
مارجان ءابىش,
«Egemen Qazaqstan»