قوستاناي وبلىسىنداعى كۇرە جولداردىڭ بويىندا ءۇي جانۋارلارىنىڭ ماكەتتەرى پايدا بولدى. جەرگىلىكتى بيلىك وكىلدەرىنىڭ ايتۋىنشا, جول شەتىنە قويىلعان مۇنداي ماكەتتەر كولىك اپاتىنىڭ ازايۋىنا كومەگىن تيگىزەدى.
تاياۋدا عانا قاراسۋ جانە ۇلكەن چۋراكوۆ ەلدى مەكەندەرىنىڭ اراسىنداعى تاس جولدىڭ بويىنا كارتوننان ىستەلگەن 3 سيىر ماكەتى ورناتىلدى. مۇنداي ماكەتتەرگە جايىلىمعا مالىن كۇندەلىكتى كۇرە جول ارقىلى ايداپ وتەتىن ەلدى مەكەندەردىڭ تۇرعىندارى دا قىزىعۋشىلىق تانىتۋدا.
– ءبىزدىڭ توڭىرەكتە جايىلىم جوق. جەرگىلىكتى شارۋاشىلىق ەسىكتىڭ الدىنا دەيىن كوپجىلدىق شابىندىق ەگىپ تاستاعان. وسى ماڭداعى 30 شاقتى ءۇيدىڭ مالىن اۋىلدىڭ شەتىنەن وتەتىن كۇرە جولدىڭ ارعى بەتىنە ايدايمىز. ەرسىلى-قارسىلى ءوتىپ جاتقان كولىكتەر كەيدە مالىمىزدى قاعىپ كەتىپ جاتادى. مۇندايدا جەمە-جەمگە كەلگەندە مال يەسى كىنالى بولىپ شىعادى. قازىرگى زاڭ بويىنشا مالدى قاراۋسىز جىبەرۋگە بولمايدى. سوندىقتان قانشا جوعارى جىلدامدىقپەن قۇيعىتىپ كەلە جاتسا دا, زاڭ كولىك جۇرگىزۋشىنىڭ جاعىندا. مالدىڭ ماڭايىنان ادام كورىنبەسە بولدى, قاراۋسىز جۇرگەن بولىپ شىعادى. ەشكىم تاڭەرتەڭنەن كەشكە دەيىن ءبىردى-ەكىلى مالدىڭ سوڭىنان سالپاقتاپ جۇرمەيدى, ۇيدە دە شارۋا بار. سوندىقتان جول بويىنا ورناتىلىپ جاتقان سيىر ماكەتتەرى مۇنداي كەلەڭسىزدىكتىڭ الدىن الادى دەپ ويلايمىن. جولعا جاقىن تۇرعان جانۋاردى كورگەن جۇرگىزۋشى دە الدىن الا جىلدامدىعىن تەجەپ, قاۋىپتى ايماقتان ابايلاپ وتەتىن بولادى. مۇنداي جول قاۋىپسىزدىگىن ەسكەرتەتىن ماكەتتەردى ءبىزدىڭ اۋىلعا 2-3 جەردەن ورناتسا ولقى ەمەس, – دەيدى ايسارى اۋىلىنىڭ تۇرعىنى ءامىر قايىروۆ.
وبلىستا ءدال وسىنداي ماكەتتەردى مال جايىلىمى جاقىن ورنالاسقان باسقا باعىتتاعى تاس جولداردىڭ بويىنا دا ورناتۋ كوزدەلىپ وتىر. جولاۋشىلار ترانسپورتى جانە اۆتوكولىك جولدارى باسقارماسىنىڭ وكىلدەرى الداعى ۋاقىتتا جول قاۋىپسىزدىگىن ەسكەرتەتىن جانۋارلار ماكەتتەرىنىڭ ارقالىق – تورعاي, قارامەڭدى – رازدولنىي – ارالكول باعىتىنداعى قاۋىپتى جول ۋچاسكەلەرىنە دە قويىلاتىنىن ايتتى.
قوستاناي وبلىسى