شىمكەنت قالاسىندا جاڭا اتشابار كەشەنىنىڭ قۇرىلىسى باستالدى. بۇگىن شىمكەنت قالالىق ءماسليحاتىنىڭ دەپۋتاتتارى مەن قوعامدىق كەڭەس مۇشەلەرىنەن قۇرالعان ىنتالى توپ جانە باق وكىلدەرى جاڭا يپپودرومنىڭ ورنىنا بارىپ, جوباسىمەن تانىسىپ قايتتى, دەپ حابارلايدى Egemen.kz.
قالانىڭ باس جوسپارىنا ساي, زاماناۋي اتشابار كەشەنى بوزارىق تۇرعىن الابىندا بوي كوتەرەتىن بولادى. ونىڭ الاڭى 39 گەكتاردى قۇرايدى. جاڭا نىساندا – جابىنى بار جاساندى جۇگىرۋ جولى, جاتتىعۋ الاڭى, ات سپورتى بويىنشا جارىستار وتكىزۋگە ارنالعان الاڭ, جابىق مىنبەر, اتقورالار, ۆەتەريناريالىق-پروفيلاكتيكالىق بەكەت, سونداي-اق قۇراما جەمگە ارنالعان قويمالار مەن سىيىمدىلىعى 310 كولىكتى قۇرايتىن اۆتوتۇراق سالۋ جوسپارلانعان.
اتشابار قۇرىلىسىن بيىلعى جىلى باستالىپ, 2022 جىلدىڭ ناۋرىز ايىندا اياقتاۋ جوسپارلانۋدا. بۇل جوبانى BI Group كومپانياسى ۋادە ەتكەندەي ءوز قارجىسى ەسەبىنەن, الەۋمەتتىك جوبا رەتىندە جۇزەگە اسىرادى. قۇرىلىس جۇمىستارىنا 10 شاقتى جەرگىلىكتى كومپانيالاردان 200-گە جۋىق ادام تارتىلاتىن بولادى.
قوعامدىق كەڭەس توراعاسى ن.بۇحارباەۆ جاڭا يپپودرومنىڭ قۇرىلىسىنىڭ ساپاسىن باقىلاۋ ماقساتىندا بەلسەندى توپ اراسىنان ارنايى كوميسسيا قۇرۋدى ۇسىندى. ياعني, كوميسسيا مۇشەلەرى اتشابار قۇرىلىسىنا قاتىستى ءوز تالاپتارى مەن ۇسىنىستارىن جەتكىزە الادى. بۇل ۇسىنىستى جوبانى جۇزەگە اسىراتىن BI Group كومپانياسى قولدادى.
ايتا كەتەيىك, بايدىبەك بي داڭعىلى بويىندا ورنالاسقان قازىرگى يپپودروم جاڭا ورىنعا كوشىرىلمەك.