ءۇش جىلدا 30-دان استام شەتەل جۇمىس كۇشىن تارتاتىن 172 كاسىپورىندا ەڭبەك, كوشى-قون جانە جۇمىسپەن قامتۋ زاڭنامالارىنىڭ ساقتالۋىنا تەكسەرۋ جۇرگىزىلگەن. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە ەحاق مينيسترلىگىنىڭ ەڭبەك, الەۋمەتتىك قورعاۋ جانە كوشى-قون كوميتەتى توراعاسىنىڭ ورىنباسارى – باس مەملەكەتتىك ەڭبەك ينسپەكتورى تولەگەن وسپانقۇلوۆ ايتتى, دەپ جازادى Egemen.kz.
بۇعان جۇمىسشىلاردىڭ جالاقى بويىنشا سايكەسسىزدىگى سەبەپ بولعان. ناتيجەسىندە 1762 قۇقىقبۇزۋشىلىق انىقتالدى. ونىڭ ىشىندە, 2019 جىلى جالاقى بويىنشا سايكەسسىزدىك جاعدايلارى 479 بولسا, 2020 جىلى بۇل كورسەتكىش ءبىر مەكەمەدەن ءبىر ادامنان عانا انىقتالدى.
«2021 جىلدىڭ 1 مامىرىنداعى جاعداي بويىنشا رەسپۋبليكادا شەتەل جۇمىس كۇشىن تارتاتىن 1 718 كاسىپورىندا 478 407 قازاقستاندىق پەن 15 443 شەتەلدىك ازامات جۇمىس ىستەيدى. اتالعان كاسىپورىنداردىڭ 100-گە جۋىعى مۇناي گاز جانە سەرۆيس سالاسىندا قىزمەت اتقارۋدا. وندا ەڭبەك ەتەتىن قازاقستاندىقتاردىڭ ۇلەسى 97 پايىزدى نەمەسە 156 مىڭ جۇمىسكەردى قۇرايدى», دەدى باس مەملەكەتتىك ەڭبەك ينسپەكتورى ءجۋرناليستىڭ سۇراعىنا بەرگەن جاۋابىندا.
ونىڭ ايتۋىنشا, شەتەل ازاماتتارىن جۇمىسقا تارتىپ جاتقان كومپانيالار قازاقستان زاڭدارىنا سايكەس شارالاردى قابىلداپ, زاڭبۇزۋشىلىققا جول بەرمەۋگە تىرىسادى.