اكىمدەردى حالىق سايلايتىن بولادى

«مەملەكەت باسشىسىنىڭ وتكەن جىلعى 1 قىركۇيەكتەگى جولداۋىنىڭ تاپسىرماسىن ىسكە اسىرۋ بارىسىندا ەلىمىزدەگى اۋداندىق ماڭىزى بار قالالاردىڭ, اۋىلداردىڭ, كەنتتەردىڭ, اۋىلدىق وكرۋگتەردىڭ اكىمدەرىن تىكەلەي سايلاۋىن ەنگىزۋ ماسەلەلەرى بويىنشا زاڭ جوباسى ازىرلەندى. قازاقستان رەسپۋبليكاسىنىڭ مەملەكەتتىك قىزمەت تۋرالى زاڭناماسىنا سايكەس بىلىكتىلىك تالاپتارىنا ساي كەلگەن جانە 25 جاسقا تولعان ەلىمىزدىڭ كەز كەلگەن ازاماتى سايلانا الادى. ساياسي پارتيالار مۇشەلەرى جانە سايلاۋشىلاردىڭ جالپى سانىنىڭ كەمىندە 1%-ىنا قول جيناعان كانديداتتار سايلاۋعا تۇسە الادى. سايلاۋ 40 كۇن بۇرىن جاريالانادى, ال سايلاۋدىڭ ءوزى قازىرگى اكىمنىڭ وكىلەتتىك مەرزىمى اياقتالعانعا دەيىن 10 كۇن بۇرىن وتەدى. سايلاۋ وتكىزىلگەننەن كەيىن ءۇش كۇن ىشىندە قورىتىندى شىعارىلادى», دەدى ۇلتتىق ەكونوميكا ءمينيسترى اسەت ەرعاليەۆ.

سايلاۋ وتكىزىلگەننەن كەيىن جەتى كۇن ىشىندە اۋماقتىق سايلاۋ كوميسسياسى سايلانعان اكىمدى تىركەيدى, سودان كەيىن ول ءوز وكىلەتتىگىنە كىرىسەدى. سايلاۋ اكىمدەردىڭ وكىلەتتىك مەرزىمىنىڭ اياقتالۋىنا قاراي جەرگىلىكتى بيۋدجەت ەسەبىنەن وتكىزىلەدى.

«بيۋدجەت زاڭناماسىنىڭ نورمالارىن ەسكەرە وتىرىپ, 2021-2022 جىلدارى قارجىلاندىرۋ رەسپۋبليكالىق بيۋدجەتتەن نىسانالى ترانسفەرتتەرمەن, ال كەيىننەن 2023 جىلدان باستاپ جەرگىلىكتى بيۋدجەت ەسەبىنەن جالپى سيپاتتاعى ترانسفەرت ارقىلى جۇزەگە اسىرىلاتىن بولادى. بيىلدىڭ II جارتىجىلدىعىندا تىكەلەي سايلاۋدى ەنگىزۋگە – 4,8 ملرد تەڭگە قاجەت بولادى. قازاقستان پرەزيدەنتى قاسىم-جومارت توقاەۆتىڭ 2021 جىلعى 15 قاڭتاردا VII شاقىرىلىمداعى پارلامەنتتىڭ ءبىرىنشى سەسسياسىنىڭ اشىلۋىندا بەرگەن تاپسىرماسىنا سايكەس, پارلامەنت ءماجىلىسى مەن ءماسليحات سايلاۋى كەزىندە ساياسي پارتيالاردىڭ ءوتۋ شەگى 7%-دان 5%-عا دەيىن تومەندەيدى, سونداي-اق بارلىق دەڭگەيدەگى سايلاۋ بيۋللەتەندەرىنە «بارلىعىنا قارسىمىن دەگەن» گرافا قوسىلادى», دەدى مينيستر.

ءمينيستردىڭ ايتۋىنشا, وسى زاڭ جوباسى اكىمدەردى تىكەلەي حالىقتىڭ سايلاۋىنا مۇمكىندىك بەرەدى. اۋىل اكىمىنىڭ حالىقتىڭ قاجەتتىلىكتەرى مەن پروبلەمالارىنا دەن قويۋ جەدەلدىگىن ارتتىرۋعا, سونداي-اق «حالىق ۇنىنە قۇلاق اساتىن مەملەكەت» تۇجىرىمداماسىن تولىق كولەمدە ىسكە اسىرۋعا مۇمكىندىك بەرەدى.

سونىمەن قاتار پالاتانىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سايلاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ىلەسپە زاڭ دا قابىلداندى.