ەكىباستۇز قالاسىندا ارنايى وپەراتسيا بارىسىندا ەسىرتكى تاسىمالدادى دەگەن كۇدىكپەن ەر ادام ۇستالدى, دەپ حابارلايدى Egemen.kz Pavlodarnews.kz سايتىنا سىلتەمە جاساپ.
وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتى بويىنشا, اتالعان فاكتىگە قاتىستى قازاقستان رەسپۋبليكاسى قك-ءنىڭ 296-بابىنا سايكەس سوتقا دەيىنگى تەرگەۋ امالدارى جۇرگىزىلۋدە.
«جەدەل ىزدەستىرۋ ءىس-شارالارىنىڭ ناتيجەسىندە ەسىرتكى قىلمىسىنا قارسى ءىس-قيمىل ءبولىمىنىڭ قىزمەتكەرلەرى «Toyota Carina» ماركالى اۆتوكولىگىنىڭ سالونىنان ەرەكشە ءيىسى بار وسىمدىك تەكتەس زات سالىنعان پوليەتيلەن پاكەت پەن ءۇش بريكەت الدى. ساراپتاما قورىتىندىسى بويىنشا تاركىلەنگەن زات سالماعى 12 كەلىدەن اساتىن كەپتىرىلگەن ماريحۋانا ەسىرتكى قۇرالى بولىپ شىقتى», دەدى پاۆلودار وبلىسى پوليتسيا دەپارتامەنتى باستىعىنىڭ ورىنباسارى جاسقايرات قايىروۆ.
كۇدىكتى رەتىندە ەكىباستۇز قالاسىنىڭ 25 جاستاعى تۇرعىنى قاماۋدا وتىر.