مۇنايلى شاھارداعى ايالدامانىڭ ءبىرى «سويلەيتىن» بولدى, دەپ حابارلايدى Egemen.kz.
اتىراۋ قالالىق اكىمدىگى ءباسپاسوز قىزمەتىنەن ءمالىم ەتكەندەي, اۆانگارد-4 شاعىن اۋدانىنداعى «پەرزەنتحانا» ايالداماسىنا ارنايى اقپاراتتىق تابلوسى بار تاقتا ورناتىلدى. بۇل – شاھارداعى العاشقى پيلوتتىق جوبا.
«اقپاراتتىق تاقتا قالا اكىمىنىڭ باستاماسىمەن ورناتىلدى. ونى «سمارت اتىراۋ» كمم ازىرلەدى. «پەرزەنتحانا» ايالداماسىنداعى اقپاراتتىق تابلودا مارشرۋت ءنومىرى, سوڭعى ايالداما مەن اۆتوبۋستىڭ كەلەتىن ۋاقىتى كورسەتىلەدى. ال, ناشار كورەتىن جانە زاعيپ جاندار ءۇشىن داۋىستى نۇسقاسى بار. داۋىسپەن حابارلاۋ ەكى تىلدە – قازاقشا جانە ورىسشا ايتىلادى. اتالعان دەرەكتەردى ءبىلۋ ءۇشىن سارى باتىرمانى باسۋ قاجەت. بۇل ەرەكشە قاجەتتىلىگى بار ادامدارعا قولجەتىمدى ورتا قۇرۋ ءۇشىن جاسالدى», دەپ حابارلادى قالالىق اكىمدىكتىڭ ءباسپاسوز قىزمەتى.