كەيىنگى كەزدە ءتۇرلى جوبالارعا مۇرىندىق بولىپ, الەۋمەتتىك جەلىلەردە تانىمال بولا باستاعان اسحات قاجىتاي ەسىمدى قاراعاندىلىق ازامات تاعى ءبىر قىزعىلىقتى ىسكە باستاماشى بولدى. ول «جاياۋ» دەپ اتالعان تانىمدىق تۋريزم جوباسىن قولعا الىپ, قاراعاندى قالاسىنان اقتوعاي اۋدانىنداعى قىزىلاراي اۋىلىنا جاياۋلاتىپ جولعا شىقتى.
ايتا كەتۋ كەرەك, وبلىس ورتالىعى مەن اتالعان اۋداننىڭ, ناقتىراق ايتقاندا, ساياحاتشى دىتتەگەن اقسوراڭ تاۋىنىڭ اراقاشىقتىعى 333 شاقىرىمدى قۇرايدى.
– جوبا بەس باعىتتان تۇرادى. ونىڭ ءبىرىنشىسى – قاراعاندى-قىزىلاراي مارشرۋتى. بۇل ساپار 24 مامىردا اقسوراڭ تاۋىنىڭ شىڭىنا كوتەرىلىپ, تۋ تىگۋمەن اياقتالادى. كەلەسى باعىت – قاراعاندى- ۇلىتاۋ. ءساتىن سالسا, جاياۋ مارافون كۇزدە تۇركىستاندا اياقتالۋى ءتيىس. مەنىڭ جوبامنىڭ نەگىزگى ماقساتى – ءبىزدىڭ ەلدىڭ تاريحي جانە مادەني قۇندىلىقتارىن پاش ەتۋ. جولدا كەزدەسكەن ءار اۋىلدىڭ وتكەنى مەن بۇگىنى تۋرالى ايتىپ, قىزىقتى ادامداردىڭ پورترەتتەرىن جاساعىم كەلەدى. سوڭعى ۋاقىتتا تانىمال بولىپ كەلە جاتقان ەكو جانە ەتنوتۋريزمگە باسا نازار اۋدارامىن. ءبىر كۇندە 56-60 شاقىرىمنان ءجۇرىپ ءوتىپ, جەتى كۇن ىشىندە قىزىلارايعا جەتەمىن دەپ ويلايمىن, – دەيدى اسحات قاجىتاي.
ساياحاتشى بۇل جوباسىن ەل تاۋەلسىزدىگىنىڭ 30 جىلدىعىنا, ۇلت كوسەمى ءاليحان بوكەيحاننىڭ 155 جىلدىق, الاش ارىستارى جاقىپ اقبايدىڭ 145 جىلدىق جانە ءالىمحان ەرمەكوۆتىڭ 130 جىلدىق مەرەيتويلارىنا ارنايتىنىن مالىمدەدى.
قاراعاندى وبلىسى