جاڭارۋدى باستى ۇستانىم ەتكەن اقتاۋ قالاسى ەل تاۋەلسىزدىگىنىڭ 30 جىلدىعى قارساڭىندا تاعى ءبىر جاڭا نىسانمەن تولىقپاق. بۇل – قازاقستان رەسپۋبليكاسى تۇڭعىش پرەزيدەنتىنىڭ ساياباعى.
ماڭعىستاۋ وبلىسى اكىمىنىڭ ءباسپاسوز قىزمەتى حابارلاعانداي, ساياباق قالانىڭ جاڭا 40-شاعىن اۋدانىندا ورنالاسادى. اۋماعى 23 گەكتار جەردى الادى دەپ بەلگىلەنگەن نىساندا قالا تۇرعىندارىنىڭ بەلسەندى دەمالۋىنا ارنالعان الاڭدار, بىرنەشە ساياباقپەن سەرۋەندەۋ ايماعىن سالۋ جوسپارلانعان. گۇلدەر اللەياسى, مۋزىكالىق سۋبۇرقاعى, بالالار ويىن الاڭدارى, سپورتتىق جۇگىرۋ جانە ۆەلوسيپەد جولدارى ورناتىلادى. ساياباقتا تامشىلاتىپ سۋارۋ جۇيەسى جۇرگىزىلىپ, دەمالۋشىلاردى جەلدەن قورعايتىن قورعانىش بولادى.
دەمالىس ورنى «BS stroy» جشس-نىڭ جەكە قاراجاتى ەسەبىنەن تۇرعىزىلادى. «BS stroy» جشس – وڭىردە ساپالى دا ساۋلەتتى تۇرعىن ءۇي قۇرىلىستارىن, قالا كوركىن اسىرار كوركەم عيماراتتار تۇرعىزۋمەن تانىلعان كومپانيا.
تانىمال كومپانيا تىزگىنىن ءوز قولىنا العان ۇلكەن ساياباقتىڭ قۇرىلىسىن 2026 جىلى تولىق اياقتاۋ جوسپارلانعان.
ماڭعىستاۋ وبلىسى