پوليتسيا دەپارتامەنتى پيروتەحنيكالىق ءونىمدى ەرەكشە قورعالاتىن اۋماقتا قولدانعانداردى ىزدەستىرىپ جاتىر, دەپ حابارلايدى Egemen.kz mangystaumedia.kz سايتىنا سىلتەمە جاساپ.
ەرەكشە قورعالاتىن اۋماققا ەنەتىن بوزجىرا شاتقالىندا بەلگىسىز بىرەۋلەر وتشاشۋ اتقانى تۋرالى بەينەجازبا الەۋمەتتىك جەلىدە تاراعان ەدى. وقيعانى الىستان باقىلاپ وتىرعان ازامات ءتۇسىرىپ العان.
الايدا وبلىستىق تابيعي رەسۋرستار باسقارماسىنىڭ باسشىسى دۇيسەن قۇسبەكوۆ وتشاشۋ بوزجىرادا اتىلماعان بولۋى مۇمكىن ەكەنىن ايتتى.
«كۇزەتتە بولعان ينسپەكتورلار بوزجىرا شاتقالىنىڭ اۋماعىندا وتشاشۋدىڭ داۋىسى ەستىلمەگەنىن, ءىزى دە جوق ەكەنىن مالىمدەدى», دەيدى ول.
باسقارما الەۋمەتتىك جەلىدە تاراعان ۆيدەو بويىنشا پوليتسيا دەپارتامەنتىنە حات جولداماق. ەگەر وتشاشۋ اتىلعانى راستالىپ, كۇدىكتى انىقتالسا اكىمشىلىك جاۋاپكەرشىلىككە تارتىلادى.