قر پارلامەنتى سەناتىنىڭ بيۋرو مۇشەلەرى پالاتانىڭ بيىلعى جىلدىڭ 13 مامىرىندا وتەتىن وتىرىسىنىڭ كۇن ءتارتىبىن بەكىتتى, دەپ حابارلايدى Egemen.kz.
سەناتورلار «2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا ارمەنيا رەسپۋبليكاسىنىڭ قوسىلۋى تۋرالى 2014 جىلعى 10 قازانداعى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسىن قارايتىن بولدى. قۇجات ەۋرازيالىق ەكونوميكالىق وداقتىڭ بىرىڭعاي كەدەندىك تاريفتەرىن تولىق يمپلەمەنتاتسيالاۋعا دەيىن كەدەندىك باجداردىڭ تومەندەتىلگەن مولشەرلەمەلەرىن قولدانۋدا ارمەنيا رەسپۋبليكاسىنا وتپەلى كەزەڭدى 1 جىل مەرزىمگە ۇزارتۋ جونىندەگى ۋاعدالاستىقتاردى ىسكە اسىرۋ ءۇشىن ازىرلەنگەن بولاتىن.
وتىرىستىڭ كۇن تارتىبىنە «2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا قىرعىز رەسپۋبليكاسىنىڭ قوسىلۋىنا بايلانىستى قىرعىز رەسپۋبليكاسىنىڭ 2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتتى, ەۋرازيالىق ەكونوميكالىق وداقتىڭ قۇقىعىنا كىرەتىن جەكەلەگەن حالىقارالىق شارتتاردى جانە ەۋرازيالىق ەكونوميكالىق وداق ورگاندارىنىڭ اكتىلەرىن قولدانۋى جونىندەگى جاعدايلار مەن وتپەلى ەرەجەلەر تۋرالى 2015 جىلعى 8 مامىرداعى حاتتاماعا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى دا ەنگىزىلدى. قۇجات ەاەو بىرىڭعاي كەدەندىك تاريفتەرىن تولىق يمپلەمەنتاتسيالاۋعا دەيىن كەدەندىك اكەلۋ باجدارىنىڭ مولشەرلەمەلەرىن قولدانۋدا قىرعىزستان ءۇشىن وتپەلى كەزەڭىن ۇزارتۋعا باعىتتالعان. زاڭ جوباسىندا قىرعىزستان اۋماعىنا ءۇشىنشى ەلدەردەن اكەلىنەتىن كەيبىر تاۋارلارعا قاتىستى كەدەندىك-تاريفتىك سالانى رەتتەۋ قامتىلعان.
بيۋرو مۇشەلەرى سونداي-اق ماجىلىستەن كەلىپ تۇسكەن بىرقاتار زاڭ جوبالارىن تۇراقتى كوميتەتتەرگە ءبولىپ بەردى.