قر پارلامەنتى سەناتىنىڭ توراعاسى ماۋلەن اشىمباەۆ قازاقستاندىقتاردى وتان قورعاۋشى كۇنىمەن Facebook پاراقشاسىندا قۇتتىقتادى, دەپ حابارلايدى Egemen.kz.
«قۇرمەتتى دوستار!
بارشاڭىزدى وتان قورعاۋشى كۇنىمەن شىن جۇرەكتەن قۇتتىقتايمىن!
بۇل – ايبىندى ارميامىزدىڭ داڭقىن اسىراتىن جانە جاۋىنگەرلىك رۋحتى دارىپتەيتىن ايرىقشا مەرەكە. ءبىز ەگەمەن ەلىمىزدىڭ قارۋلى كۇشتەرىن قۇرۋ ارقىلى تاۋەلسىزدىگىمىزدىڭ بەرىك قالقانىن, بەيبىتشىلىك پەن تۇراقتىلىقتىڭ مىزعىماس نەگىزىن قالىپتاستىردىق.
مەملەكەت باسشىسى اتاپ وتكەندەي, قازىرگى تاڭدا قارۋلى كۇشتەرىمىز جەرىمىزدىڭ تۇتاستىعى مەن ەلىمىزدىڭ تىنىشتىعىن قاس قاقپاي كۇزەتىپ تۇر. وتان قورعاۋ جولىندا ساپ تۇزەگەن ساربازدارىمىز باتىر بابالارىمىزدىڭ ەرلىك ءداستۇرىن لايىقتى جالعاستىرىپ كەلەدى. شىن مانىندە, ءبىزدىڭ ارميامىز اۋەدە, جەردە جانە تەڭىزدە جاھاندىق باسەكەگە قابىلەتتى قۋاتتى كۇشكە اينالدى. ىندەتپەن كۇرەس كەزىندە دە اسكەرىمىز انتقا ادالدىقتىڭ وزىق ۇلگىسىن كورسەتە ءبىلدى. الداعى ۋاقىتتا دا قارۋلى كۇشتەرىمىزدىڭ الەۋەتى ارتىپ, قورعانىسىمىز كۇشەيە بەرسىن.
مەرەكەمەن قۇتتىقتاي وتىرىپ, ءار شاڭىراققا شاتتىق, ازاماتتارىمىزعا اماندىق تىلەيمىن. ارقاشان اسپانىمىز اشىق, ەلىمىز تىنىش بولسىن!», دەلىنگەن قۇتتىقتاۋدا.