بقو دەنساۋلىق ساقتاۋ باسقارماسى بۇرىنعى باسشىسىنىڭ ءىسى سوتقا جىبەرىلدى

ول پارا الدى دەگەن كۇدىككە ىلىنگەن. ايىپتالۋشى تاراپقا ۆەدومستۆونىڭ تاعى ءبىر ەكس-قىزمەتكەرى ايدوس سەبەپوۆ قوسىلدى. ول سەرىك تۇراليەۆپەن بىرگە پارا الۋعا كومەكتەسكەن دەگەن ايىپ تاعىلدى.

«27 ساۋىردە قىلمىستىق ءىس قايتا سوتقا جولداندى. قىلمىستىق ىسكە كايۋپوۆ پەن تۇراليەۆكە قوسا سەبەپوۆ تا ايىپتالۋشى رەتىندە قوسىلعان. ايىپتاۋ قورىتىندىسىنا سايكەس, كايۋپوۆ بقو دەنساۋلىق ساقتاۋ باسقارماسىنىڭ باسشىسى بولا وتىرىپ, جشس-مەن 78 ميلليون تەڭگەدەن اسا سوماعا جابدىقتى جەتكىزۋگە ارنالعان مەملەكەتتىك ساتىپ الۋ تۋرالى شارت جاساسقان. كەيىن جشس ديرەكتورىنان ورىندالعان جۇمىستار اكتىسىنە كەدەرگىسىز قول قويىپ, مەديتسينالىق جابدىقتى قابىلداعانى ءۇشىن شارت سوماسىنىڭ 10 پايىزىن تالاپ ەتكەن. كايۋپوۆ تۇراليەۆ پەن سەبەپوۆتىڭ كومەگىمەن 2020 جىلدىڭ 14 قازانىندا 3,4 ميلليون تەڭگە, ال 23 قازاندا 4,4 ميلليون تەڭگە پارا الدى دەپ ايىپتالىپ وتىر» , دەدى وبلىستىق سوت ءباسپاسوز قىزمەتى وكىلدەرى.

الايدا پروكۋرور ىسكە تاعى ءبىر تۇلعا - ايدوس سەبەپوۆتىڭ قاتىسى بولۋى مۇمكىن دەگەن نۇسقامەن ءىستى تەرگەۋگە قايتارۋ تۋرالى ءوتىنىش ءبىلدىردى. بولاتبەك كايۋپوۆ پەن سەرىك تۇراليەۆتىڭ ءوزى سوت تالقىلاۋى كەزىندە ول تۋرالى بىرنەشە رەت ايتقان, ال كۋاگەر بۋلەكوۆا باستاپقىدا تۇراليەۆ ايدوستىڭ اتىنان كەلگەنىن ايتقان بولاتىن.

ايتا كەتەيىك, 2021 جىلدىڭ اقپانىندا مەملەكەتتىك ايىپتاۋ تاراپى ءوتىنىشى بويىنشا قىلمىستىق ءىس ۇشىنشى تۇلعانى قىلمىستىق جاۋاپكەرشىلىككە تارتۋ قاجەتتىلىگىنە بايلانىستى پروكۋراتۋراعا قايتارىلعان بولاتىن. سوت پروتسەسى بارىسىندا وعان قاتىسۋشىلار دەنساۋلىق ساقتاۋ باسقارماسىندا جۇمىس ىستەگەن ايدوس سەبەپوۆتىڭ ەسىمىن بىرنەشە رەت اتاعان. سوتتالۋشى تۇراليەۆ جشس وكىلدەرىمەن كەزدەسىپ, ونىڭ نۇسقاۋى بويىنشا ارەكەت ەتكەنىن ايتتى. كايۋپوۆتىڭ ءوزى سەبەپوۆ سەنىمدى دوسى ەكەنىن ايتقان.