شارتاراپتى شارلاعان پاندەميا باستالعالى الەمدە دە, ەلىمىزدە دە كوپتەگەن وزگەرىس ورىن الدى. ەكونوميكانىڭ ءتۇرلى سالالارىنان بولەك, قوعامنىڭ مادەني-رۋحاني تىرشىلىگى دە توقتاپ قالعان كەزدەر بولدى. وسى ءبىر «وقشاۋلانۋ ۋاقىتى» شىعارماشىلىق يەلەرىنە قالاي اسەر ەتتى؟
ادەبي ساۋالدامامىزدىڭ كەزەكتى اۆتورى – «قۇرمەت» وردەنىنىڭ يەگەرى, اقىن سۆەتقالي نۇرجان.
– ارينە, شاعىن ولەڭدەر ساتىنە قاراي جازىلا بەرەدى عوي. سوڭعى جىلدارى ءبىرتالاي كولەمدى دۇنيەلەر اكەلىپپىن. «كىشى قيامەتتەگى قازاقستان» اتتى ءافسانا-حيكايا داستاندار شوعىرى, «بابا-داستان» دەگەن تاريحي داستاندار تسيكلى اياسىنداعى شىعارمالار, درامالىق تۋىندىلار, ءتارجىمالار, ەسسەلەر دۇنيەگە كەلدى. ولاردىڭ ءالى دە جازىلا بەرەتىن ءتۇرى بار. سونداي-اق, «ماعداۋيات مايدانى» اتتى سينكرەتتى سيپاتتاعى ەكى توم ەڭبەك جازىلۋ ۇستىندە. ەكىنشى تومىنىڭ تىنعىسى قويىلۋعا تاقاۋ… ايتپاقشى, بۇلار نەكەن-نۇقان بولماسا, ءازىر تۇتاستاي باسپا ءجۇزىن كورە قويعان جوق. ازىرگە – وسى.
ال جازىلماي, تولعاعى جەتپەي, كىلتى تابىلماي جاتقان نارسەلەر شاش-ەتەكتەن… ءبىر پاراسىن عانا ايتايىن. مەنىڭ ۇلى بي ەدىگە, حان توقتامىس, ءامىر تەمىر زامانى تۋرالى تولعانعانىما ءبىراز بولدى. كىلتى قولعا تۇسپەي ءجۇر. تۇسسە, قالعانى قيىن بولماس ەدى. ءاز تاۋكەنىڭ ساردارى, قازاق جادىندا تالاي ەرتەك-اڭىزدارعا ارقاۋ بولعان ەسەنعۇل ۇلى ەسەك-مەرگەن باتىر جايلى تاريحي-پۋبليتسيستيكالىق جانرداعى ەڭبەك جازعىم كەلىپ ءجۇر. ماتەريالدارى دايىن, بىراق ىشكى دايىندىعىم پىسپەي جاتىر. ودان كەيىن, كوپتەن ۇلى جوباسى كەۋدەمدە قالانىپ جاتقان «تاس كىتاپقا» كىرىسەتىن شىعارمىن. قالعانىن قۇداي عۇمىر بەرسە, ۋاقىت كورسەتەر… «سەمىزدەۋ سويلەپ» قويسام, مارتەبەلى وقىرماننان الدىن-الا عافۋ وتىنەمىن. بارىم – وسى.
– شىعارماشىلىق سىرىڭىزبەن بولىسكەنىڭىزگە راحمەت.