قر پرەزيدەنتىنىڭ ءباسپاسوز حاتشىسى بەرىك ءۋالي Facebook پاراقشاسىندا مەملەكەت باسشىسىنىڭ وتكەن جىلعى جولداۋىندا بەرگەن تاپسىرمالارىنىڭ ءبىرى تولىق ورىندالعانىن جازدى, دەپ حابارلايدى Egemen.kz.
مەملەكەت باسشىسى قاسىم-جومارت توقاەۆ وتكەن جىلى جاريا ەتكەن «جاڭا جاعدايداعى قازاقستان: ءىس-قيمىل كەزەڭى» اتتى جولداۋىندا: «بالالار ۇيىرمەسى» قىزمەتىن قايتا قالپىنا كەلتىرگەن ءجون. وندا جاستارىمىز قولونەردىڭ جانە شىعارماشىلىقتىڭ باستاپقى نەگىزدەرىمەن تانىسار ەدى», دەپ اتاپ وتكەن بولاتىن.
ال پرەزيدەنت ءباسپاسوز حاتشىسى مەملەكەتتىك شىعارماشىلىق جانە سپورتتىق تاپسىرىستى ىسكە اسىرۋ ارقىلى بالالار مەن جاسوسپىرىمدەردىڭ شىعارماشىلىق جانە سپورتتىق الەۋەتىن ارتتىرۋ ءۇشىن مەملەكەتتىك قوگلداۋدىڭ جاڭا ينستيتۋتى ەنگىزىلگەندىگىن جازدى.
ونىڭ اياسىندا 2021 جىلدىڭ 1 مامىرىنان باستاپ مەملەكەتتىك شىعارماشىلىق جانە سپورتتىق تاپسىرىس جۇزەگە اسىرىلادى. ول ءۇشىن بيىل جەرگىلىكتى اتقارۋشى ورگاندار تاراپىنان مەملەكەتتىك شىعارماشىلىق تاپسىرىستى ىسكە اسىرۋعا 2,4 ملرد تەڭگە, سپورتتىق تاپسىرىستى ىسكە اسىرۋعا 3,7 ملرد تەڭگە ءبولۋ كوزدەلگەن.
2021 جىلى رەسپۋبليكا بويىنشا جان باسىنا شاققاندا 23,5 مىڭ شىعارماشىلىق ۇيىرمە جانە 1029 سپورت سەكتسياسى قارجىلاندىرىلادى. وندا شامامەن 43,3 مىڭ بالا سپورتپەن جانە شىعارماشىلىقپەن (شىعارماشىلىق ۇيىرمەلەردە - 23,5 مىڭ بالا, سپورت سەكتسيالارىندا – 21 548 بالا) تەگىن اينالىساتىن بولادى.