46 جاستاعى تۇرعىنعا قاتىستى قر اقبك 1-ءبولىمىنىڭ 438-بابى بويىنشا اكىمشىلىك حاتتاما تولتىرىلدى, دەپ حابارلايدى Egemen.kz
– پاۆلودارلىق ساعات 10.12-دە پوليتسياعا ءبىر اپتا بۇرىن تانىسىنىڭ پاتەرىنەن 50 000 تەڭگە اقشا مەن تەلەديداردى ۇرلاپ كەتكەنى تۋرالى حابارلاعان. وقيعا ورنىنا بارعان پوليتسيا ۇرلىق فاكتىسى بولماعانىن انىقتادى. پاتەر يەسىنىڭ ۇيىندە ۇزاق ۋاقىت بويى جارىق جوق بولىپ شىقتى, ال قولدا بار تۇرمىستىق تەحنيكانى ساتىپ جىبەرگەن. بۇعان قوسا, ول ماس كۇيىندە بولعان, ءتىپتى, پوليتسيا شاقىرعانىن ەسىنە تۇسىرە الماعان, – دەدى وبلىستىق پوليتسيا دەپارتامەنتى جەرگىلىكتى پوليتسيا قىزمەتىنىڭ باستىعى عالىم سارعۇلوۆ.
ەر ادامعا 30 اەك كولەمىندە ايىپپۇل سالىندى. ايتا كەتەرلىگى, بۇعان دەيىن ۋچاسكەلىك پوليتسيا ينسپەكتورى جالعان اقپارات بەرگەن تۇرعىنعا قاتىستى ماجبۇرلەپ ەمدەۋ ءۇشىن ماتەريال جيناپ, سوتقا جىبەرگەن. جىل باسىنان بەرى وبلىستا 19 تۇرعىن ارنايى قىزمەتكە جالعان قوڭىراۋ شالعانى ءۇشىن جاۋاپقا تارتىلدى.