جامبىل وڭىرلىك كوممۋنيكاتسيالار قىزمەتى الاڭىندا وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى حاميت مىرزاقاسىموۆ وبلىستا جىل باسىنان بەرى 3 انا ءولىمى تىركەلگەنىن مالىمدەدى, دەپ حابارلايدى Egemen.kz
بيىل جامبىل وبلىسىندا مەديتسينالىق قۇرال-جابدىقتار ساتىپ الۋعا 2,477 ملرد قاراجات ءبولىندى. وعان ەمدەۋ-الدىن الۋ ۇيىمدارىنا 120 دانا مەديتسينالىق قۇرال-جابدىق الۋ جوسپارلانعان.
ول بريفينگتە «Nur Otan» پارتياسىنىڭ «وزگەرىستەر جولى: ءار ازاماتقا لايىقتى ءومىر!» اتتى سايلاۋالدى باعدارلاماسىن ىسكە اسىرۋ جونىندەگى جول كارتاسىنىڭ ورىندالۋى بويىنشا ءتۇرلى باعىتتارعا توقتالىپ ءوتتى.
وسىعان بايلانىستى مەديتسينالىق جابدىقتار الۋ باعدارلاماداعى 70-ءشى باعىتقا جاتادى. جالپى, جول كارتاسىندا دەنساۋلىق ساقتاۋ سالاسىنا قاتىستى 12 تارماق بار.
«جول كارتاسى بويىنشا جۇمىستارعا توقتالار بولسام, بۇگىندە تاراز قالاسىندا 200 توسەك-ورىندىق وبلىستىق ونكولوگيالىق ديسپانسەر سالىنۋدا. ونىڭ قۇرىلىسى 2018 جىلدىڭ قاراشا ايىندا باستالعان. سونداي-اق وبلىس بويىنشا جالپى ءولىم-ءجىتىم كورسەتكىشىن تومەندەتۋ, نارەستە ءولىم كورسەتكىشىن ازايتۋ بويىنشا اتقارىلاتىن جۇمىستارعا ارنالعان تارماقتار بار. جالپى, اعىمداعى جىلدىڭ 1 توقسانىندا وڭىردە 3 انا ءولىمى تىركەلىپ, كورسەتكىش - 45,0-ءدى قۇرادى», دەدى ح.مىرزاقاسىموۆ.