قۇرلىقتىق حوككەي ليگاسىنىڭ (قحل) گاگارين كۋبوگى جولىنداعى بيىلعى جارىس ءوز مارەسىنە جەتتى. پلەي-وفف كەزەڭىنىڭ التى ويىنعا سوزىلعان فينالدىق كەزدەسۋىندە 4:2 ناتيجەسىمەن ماسكەۋدىڭ تسسكا كلۋبىنان باسىم تۇسكەن ومبىنىڭ «اۆانگارد» ۇجىمى ءوز تاريحىندا تۇڭعىش رەت گاگارين كۋبوگىنىڭ جەڭىمپازى اتاندى.
ەلوردانىڭ «بارىسىمەن» بىرگە قحل-ءدىڭ «شىعىس» كونفەرەنتسياسىندا ونەر كورسەتەتىن «اۆانگارد» پلەي-وفف كەزەڭىنىڭ 1/8 فينالىندا ەكاتەرينبۋرگتىڭ «اۆتوموبيليست» كلۋبىن بەس ويىندا 4:1 ەسەبىمەن جەڭسە, شيرەك فينالدا ماگنيتوگورسكىنىڭ «مەتاللۋرگىن» 4:2 ناتيجەسىمەن قاپى قالدىردى. جارتىلاي فينالدا «شىعىس» كونفەرەنتسياسىنىڭ جەڭىمپازى قازاننىڭ «اك بارسىمەن» كەزدەسىپ, تارتىسقا تولى جەتى ويىندا 4:3 ەسەبىمەن باسىم ءتۇستى. ال تسسكا فينالعا دەيىن ماسكەۋدىڭ «سپارتاك» (4:0), ءياروسلاۆلدىڭ «لوكوموتيۆ» (4:3) جانە جارتىلاي فينالدا سانكت-پەتەربۋرگتىڭ سكا (4:2) كلۋبتارىن جەڭگەن بولاتىن.
«اۆانگارد» پەن تسسكا اراسىنداعى فينالدىق ماتچ التى ويىنعا سوزىلدى. العاشقى كەزدەسۋدە ومبىلىقتار جەڭىسكە جەتسە, كەيىنگى ەكى ويىندا تسسكا باسىمدىق تانىتتى. ءتورتىنشى ماتچتا «اۆانگارد» وۆەرتايمدا باسىم تۇسسە, سىرت ايدىنداعى بەسىنشى كەزدەسۋدە دە قوناقتار ايدىن يەلەرىنە قاراعاندا مىقتىلىق تانىتتى. ءسويتىپ بەس كەزدەسۋدەن كەيىن «اۆانگارد» 3:2 ناتيجەسىمەن الدا تۇردى. التىنشى ماتچ ومبىلىقتار ءۇشىن شەشۋشى, ماسكەۋلىكتەر ءۇشىن ەسەپتى تەڭەستىرەتىن ۇرىمتال ءسات ەدى. الايدا ماسكەۋدە وتكەن كەزدەسۋ 1:0 ەسەبىمەن «اۆانگاردتىڭ» پايداسىنا اياقتالىپ, ومبى كلۋبى ءوز تاريحىندا تۇڭعىش رەت گاگارين كۋبوگىن جەڭىپ الدى. ماتچتاعى جالعىز ءارى جەڭىستى شايبانى سەرگەي تولچينسكي سالدى. وسىلايشا ومبىلىق كلۋبتىڭ شابۋىلشىسى پلەي-وفف كەزەڭىنىڭ ەڭ باعالى ويىنشىسى اتاندى. قحل-دىڭ وسى ماۋسىمىندا تولچينسكي 24 ويىن وتكىزىپ, 20 ۇپاي جيناعان. ياعني التى مارتە مەرگەندىگىمەن كوزگە تۇسسە, 14 مارتە ارىپتەستەرىنە ناتيجەلى پاس اسىرعان.
قحل تاريحىندا اتالعان ەكى كلۋب كەيىنگى ەكى جىلدا ءتۋرنيردىڭ فينالىندا كەزدەسىپ, ەكى ۇجىم دا وزدەرىنىڭ العاشقى چەمپيوندىقتارىن تويلادى. ماسەلەن, 2018/2019 جىلعى ماۋسىمنىڭ فينالىندا تسسكا ءدال وسى «اۆانگاردتى» جەڭىپ, تۇڭعىش رەت گاگارين كۋبوگىنا يە بولدى. بىلتىرعى ماۋسىم كوروناۆيرۋس پاندەمياسىنا بايلانىستى مەرزىمىنەن بۇرىن اياقتالسا, مىنە بيىل «اۆانگارد» ءبىرىنشى چەمپيوندىعىن تويلاپ جاتىر.
«اۆانگارد» «شىعىس» كونفەرەنتسياسىندا گاگارين كۋبوگىن جەڭىپ العان ءتورتىنشى كوماندا بولدى. بۇعان دەيىن «اك بارس», «سالاۆات يۋلاەۆ» جانە «مەتاللۋرگ» حوككەيشىلەرى قوس قۇلاقتى كۋبوكتى باسىنان اسىرا كوتەرگەن بولاتىن. كەلەسى ماۋسىمدا «شىعىس» كونفەرەنتسياسىنداعى جەڭىمپازدار جولىن قازاقستاننىڭ «بارىسى» جالعايدى دەپ ۇمىتتەنەمىز.