ءورت ءسوندىرۋ ستانسالارىن سالۋ جونىندەگى جول كارتاسى ازىرلەنەدى

ۇكىمەت باسشىسىنىڭ ورىنباسارى رومان سكليار ورمان-دالا ورتتەرىنىڭ الدىن الۋ جانە ولاردى جويۋ ماسەلەلەرى بويىنشا تاپسىرمالار بەردى.

توتەنشە جاعدايلار ءمينيسترى يۋري ءيليننىڭ توراعالىعىمەن وتكەن كوميسسيا جۇمىسىنا ورتالىق مەملەكەتتىك ورگانداردىڭ باسشىلارى, اكىمدەردىڭ ورىنباسارلارى, وڭىرلەردىڭ تجد باستىقتارى قاتىستى. رومان سكليار ازاماتتاردىڭ ءومىر قاۋىپسىزدىگىن قامتاماسىز ەتۋ, م ۇلىكتى قورعاۋ مەملەكەتتىڭ باسىم مىندەتى ەكەنىن اتاپ ءوتىپ, كۇشتەر مەن قۇرالداردىڭ جەدەل دەن قويۋعا دايىندىعىن قامتاماسىز ەتۋدى, سونداي-اق اۆياتسيانى تارتۋدى قاراستىرۋدى تاپسىردى.

مۇددەلى مەملەكەتتىك ورگاندارعا اكىمدىكتەرمەن بىرلەسىپ تابيعات قورعاۋ جانە ورمان مەكەمەلەرىن ءورت-تەحنيكالىق جاراقتارمەن جابدىقتاۋ, ورمان ءورت ءسوندىرۋ ستانسالارى مەن باقىلاۋ مۇنارالارىن سالۋ جونىندەگى جول كارتاسىن ازىرلەۋ تاپسىرىلدى.

يۋ.يلين قازىرگى ءورت قاۋىپتى كەزەڭگە قاتىستى 43 مىڭ ادام, 9 مىڭنان استام تەحنيكا, سۋ اعىزاتىن قۇرىلعىلارى بار 10 تىكۇشاق جانە ءىرى ءورت بولعان جاعدايدا 46 ءورت ءسوندىرۋ پويىزى بار كۇشتەر مەن قۇرالداردىڭ دايىندىعى تۋرالى ايتتى. 4 مىڭنان استام ەرىكتى قۇرىلىم قۇرىلدى.

اكىمدىكتەر 400-دەن استام ءورت ءسوندىرۋ بەكەتتەرىن قۇردى, ولار 1273 ەلدى مەكەندى قورعاۋدى قامتاماسىز ەتەدى. قابىلدانعان شارالار تۋرالى ەكولوگيا, گەولوگيا جانە تابيعي رەسۋرستار ۆيتسە-ءمينيسترى س.برەكەشەۆ, ورتكە قارسى قىزمەت كوميتەتىنىڭ توراعاسى ن.دەربىسوۆ, بىرقاتار وبلىس اكىمدەرىنىڭ ورىنباسارلارى باياندادى.