قازاقستاندا ەل اۋماعىنداعى كيىكتەردىڭ سانىن انىقتاۋ ءۇشىن ارنايى اۋە ەسەبى جۇرگىزىلۋدە. ەسكە سالا كەتەيىك, 2020 جىلى كارانتيندىك شەكتەۋلەرگە بايلانىستى اۋە ەسەبى جۇرگىزىلمەي قالعان بولاتىن.
اۋە ەسەبىن «وحوتزووپروم» رمقك قىزمەتكەرلەرى, ورمان شارۋاشىلىعى جانە جانۋارلار دۇنيەسى كوميتەتىنىڭ وبلىستىق اۋماقتىق ينسپەكتسياسى جانە قازاقستانداعى بيوالۋانتۇرلىلىكتى ساقتاۋ قاۋىمداستىعىنىڭ عىلىمي ماماندارى بىرلەسىپ جۇرگىزۋدە.
قازىرگى تاڭدا ەلىمىزدە «وحوتزووپروم» ينسپەكتورلارىنىڭ ەكى ەسەپ توبى جۇمىس ىستەۋدە. ولاردىڭ ءبىرىنشىسى – بەتپاقدالا پوپۋلياتسياسىنا, ەكىنشىسى ورال جانە ءۇستىرت پوپۋلياتسيالارىنا ەسەپ جۇرگىزۋدە. ەسەپكە تىكۇشاقپەن 200-گە جۋىق ۇشۋ ساعاتى قاراستىرىلعان.
2019 جىلى جۇرگىزىلگەن ەسەپكە الۋ جۇمىستارىنا سايكەس قازاقستانداعى كيىكتەردىڭ سانى 334 400 باستى قۇرادى.
وسى كەزەڭدە اقبوكەندەردىڭ اۋە ەسەبى باتىس قازاقستان, اقتوبە جانە ماڭعىستاۋ وبلىستارىندا (ورال جانە ءۇستىرت تارالىمى) اياقتالدى جانە بەتپاقدالا پوپۋلياتسياسىن ەسەپكە الۋ بويىنشا قاراعاندى, اقمولا وبلىستارىنىڭ اۋماقتارىندا جالعاسۋدا.
كيىكتەردىڭ اۋە ەسەبىن 2021 جىلدىڭ 5 مامىرىنا دەيىن اياقتاۋ جوسپارلانۋدا.