قازاقستاننىڭ تۇركياداعى قۇرمەتتى كونسۋلى, قازاق-تۇرىك قارىم-قاتىناسىنا ەلەۋلى ۇلەس قوسىپ جۇرگەن بەلگىلى كاسىپكەر حاليل ۋلۋەر جۇبايىمەن بىرگە جول اپاتىنان قازا تاپتى, دەپ حابارلايدى Egemen.kz «حابار 24» ارناسىنا سىلتەمە جاساپ.
2009 جىلدان بەرى قازاقستاننىڭ نەۆشەحير قالاسىنداعى قۇرمەتتى كونسۋلى قىزمەتىن اتقارىپ جۇرگەن ۋلۋەردىڭ اتسالىسۋىمەن تۇركيادا بىرقاتار كوشە مەن ساياباققا قازاقستان مەن قازاق تۇلعالارىنىڭ ەسىمى بەرىلدى. ءداستۇرلى تۇردە ەلىمىزدىڭ اتاۋلى كۇندەرىندە كاپپادوكيادا اۋە شارلارىندا مەملەكەتتىك تۋىمىزدى جەلبىرەتكەن حاليل ۋلۋەردىڭ ەڭبەگى وراسان.
«حاليل ۋلۋەر تەك ءوز ەلىنىڭ ەمەس, قازاق حالقىنىڭ ناعىز جاناشىر دوسى ەدى. قازاقستاننىڭ كوك تۋىن جەلبىرەتىپ, قازاقستان ءۇشىن ماقتان تۇتاتىن ءبىرتۋار ازامات ەدى. پاندەميا كەزىندە وسىنداعى ستۋدەنتتەرگە كومەكتەسىپ جۇرگەن بولاتىن. قازاقستانعا پاندەميا كەزىندە گۋمانيتارلىق كومەك جولداپ, قول ۇشىن بەرگەندەردىڭ الدىڭعى شەبىندە ەدى. ەلىمىزگە ينۆەستيتسيا تارتۋ ءۇشىن كەزدەسۋلەر وتكىزىپ, كەلىسسوزدەر جۇرگىزدى. اتتەڭ, تاعدىر ونى بىزگە قيمادى. قاسيەتتى ورازا ايىندا اللا تاعالا كەشىرىمى مەن مەيرىمىن جازسىن», دەدى قازاقستاننىڭ تۇركياداعى توتەنشە جانە وكىلەتتى ەلشىسى ابزال ساپاربەك ۇلى Facebook پاراقشاسىندا.
تۋريزمنەن باستاپ اۆياتسيا, تەڭىز, باسپا جانە ۆيزۋالدىق باق پەن قورعانىس سالاسىندا 8 كومپانيانى باسقارعان ۋلۋەردىڭ ەكى ۇلى, ءبىر قىزى بار.