ەل گازەتى «ەگەمەن» قوستاناي وبلىسىنداعى تاريحي جەر اتاۋلارى تۋرالى وتە ورىندى ماسەلە كوتەرىپ وتىر. ءوزىم التىنسارين اۋدانىنا قاراستى سيلانتەۆ اۋىلىندا تۇرامىن. تىڭ يگەرۋ جىلدارى سول كەزدەگى بيلىك بۇل اۋىلدى قالاي اتاساق ەكەن دەپ ەشكىمنەن اقىل سۇراعان جوق, بارلىق ەلدى مەكەننىڭ اتاۋىن بەلدەن باسىپ اكىمشىلىك جولمەن قويدى.
ەندى, مىنە, تاۋەلسىزدىك العانىمىزعا تابانى كۇرەكتەي 30 جىل تولىپتى. 30 جىلدىڭ ىشىندە ەڭ بولماسا 30 ەلدى مەكەننىڭ اتاۋىن وزگەرتە الماي وتىرمىز. نەدەن قورقىپ, كىمگە جالتاقتاپ وتىرعانىمىز بەلگىسىز. مىسالى, التىنسارين اۋدانىندا ىرگەلەس وتىرعان سيلانتەۆ, مالايا چۋراكوۆكا, بولشايا چۋراكوۆكا, ششەرباكوۆ, پەرۆوماي دەگەن ەلدى مەكەندەر اتاۋىنىڭ ءبىرى دە وزگەرگەن جوق. اۋدان التىنسارين دەپ اتالعانىمەن, قۇرامىنداعى اۋىلداردىڭ دەنى وزگە تىلدە اتالادى. ەندى نە ءبىر تاريحى, نە ءبىر تەگى جوق ماعىناسىز اتاۋلارمەن قوشتاسىپ, جاڭا زامانعا لايىق اتاۋ قوياتىن نەمەسە تاريحي اتاۋلاردى قايتا جاڭعىرتاتىن كەز كەلدى عوي. مەن وسى ماسەلەنى كوتەرەمىن دەپ اكىمدەرگە دە جاماناتتى بولىپ ءبىتتىم. اۋدان اكىمى, ءتىپتى سويلەسۋدى دە قويدى, كورگىسى كەلمەيدى, قاشادى مەنەن. بارسام, كابينەتىنە كىرە المايمىن. ول كىسىنىڭ دە قولىندا تۇرعان ەشتەڭە جوق ەكەنىن تۇسىنەمىن, بىراق ەل كەلەشەگى ءۇشىن ماڭىزدى ماسەلەنى ايتۋ پارىز.
حالقىمىزدا «جالعىزدىڭ ءۇنى شىقپايدى, جاياۋدىڭ شاڭى شىقپايدى» دەگەن اتالى ءسوز بار, وسى ورايدا كوپ بولىپ ويلاسىپ, ەل تاۋەلسىزدىگىنىڭ 30 جىلدىق قۇرمەتىنە, ءيا بولماسا, ۇلى اعارتۋشى ىبىراي اتامىزدىڭ 180 جىلدىعىن ەسكەرە وتىرىپ, قوستاناي وبلىسىنداعى 30 ەلدى مەكەننىڭ تاريحي اتاۋىن قايتا جاڭعىرتۋ تۋرالى ۇسىنىس ايتقىم كەلەدى. بەدەلدى عالىمدار مەن وبلىس, رەسپۋبليكاداعى قۇزىرلى ورىندار جۇمىلىپ وسى يگى باستاماعا قولداۋ بىلدىرەدى دەپ سەنەمىن.
ناعاشىباي الپىسوۆ,
جىرشى, زەينەتكەر
قوستاناي وبلىسى,
التىنسارين اۋدانى