بۇگىن حالىقارالىق تۇركى اكادەمياسى تاتار حالقىنىڭ كلاسسيك اقىنى عابدوللا توقايدىڭ 135 جىلدىق مەرەيتويىنا ارنالعان «عابدوللا توقاي جانە تۇركى الەمى» اتتى حالىقارالىق كونفەرەنتسيا وتكىزدى, دەپ حابارلايدى Egemen.kz تۇركى اكادەمياسىنىڭ ءباسپاسوز قىزمەتىنە سىلتەمە جاساپ.
ونلاين فورماتتا وتكەن القالى جيىنعا حالىقارالىق تۇركى اكادەمياسىنىڭ پرەزيدەنتى دارحان قىدىرالى, م. اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ, تاتارستان رەسپۋبليكاسى عىلىمدار اكادەمياسىنىڭ ۆيتسە-پرەزيدەنتى دانيا زاگيدۋللينا, نازارباەۆ ۋنيۆەرسيتەتى قازاق ءتىلى جانە تۇركولوگيا كافەدراسىنىڭ مەڭگەرۋشىسى يۋلاي شاميلوعلى, تاتارستان رەسپۋبليكاسى عىلىم اكادەمياسى ع. يبرايموۆ اتىنداعى ءتىل, ادەبيەت جانە ونەر ينستيتۋتىنىڭ ءماتىنتانۋ ءبولىمىنىڭ مەڭگەرۋشىسى مارسەل يبراگيموۆ, تاتارستان رەسپۋبليكاسىنىڭ قازاقستان رەسپۋبليكاسىنداعى رەسمي وكىلى دەنيس ۆالەەۆ, نۇر-سۇلتان قالاسىنىڭ «تاڭ» تاتار-باشقۇرت مادەني ورتالىعىنىڭ جەتەكشىسى ياننات نيزامۋتدينوۆا, رعا ۋفا عىلىمي ورتالىعى تاريح, ءتىل جانە ادەبيەت ينستيتۋتىنىڭ قولجازبالار ءبولىمىنىڭ جەتەكشىسى احات ساليحوۆ, ەگەي ۋنيۆەرسيتەتىنىڭ پرفەسسورى مۇستافا ونەر, ل.ن. گۋميلەۆ اتىنداعى ەۇۋ تۇركولوگيا كافەدراسىنىڭ پروفەسسورى امانتاي ءشارىپ, سونىمەن قاتار تۇركى ەلدەرىنىڭ تانىمال عالىمدارى مەن زيالى قاۋىم وكىلدەرى قاتىستى.
جيىننىڭ اشىلۋىندا ءسوز سويلەگەن اكادەميا پرەزيدەنتى دارحان قىدىرالى عابدوللا توقاي شىعارماشىلىعىنىڭ تۇركى الەمىندە الاتىن ورنى تۋرالى بايانداپ, كونفەرەنتسيا جۇمىستارىنا تابىس تىلەدى.
«عابدوللا توقايدىڭ مەرەيتويى باۋىرلاس تاتارستان جۇرتشىلىعى ءۇشىن عانا ەمەس, بۇكىل تۇركى حالىقتارى ءۇشىن دە ايتۋلى وقيعا», دەدى اكادەميا باسشىسى.
كونفەرەنتسيا بارىسىندا عالىمدار تاتار كلاسسيگىنىڭ ەڭبەك جولى مەن رۋحاني مۇراسىنا توقتالىپ, سونداي-اق شىعارماشىلىعىنداعى جالپى ادامزاتتىق قۇندىلىقتار مازمۇندى باياندامالار جاسادى.