كەزدەسۋدە نۇرسۇلتان نازارباەۆقا ەلىمىزدەگى ەتنوسارالىق قاتىناستار سالاسىنداعى احۋال جانە قازاقستان حالقى اسسامبلەياسىنىڭ «بىرلىكتىڭ, تاتۋلىق پەن كەلىسىمنىڭ 30 جىلى» اتتى الداعى XXIX سەسسياسىنا ازىرلىك بارىسى تۋرالى باياندالدى, دەپ حابارلايدى Egemen.kz ەلباسىنىڭ رەسمي سايتىنا سىلتەمە جاساپ.
– 1995 جىلعى شەشىمىم بويىنشا قۇرىلعان اسسامبلەيانىڭ جۇمىسىن مەن ەرەكشە باقىلاپ وتىرامىن. سودان بەرى ەتنوسارالىق قاتىناستاردى نىعايتۋ سالاسىندا ءبىراز شارۋا اتقارىلدى. ءبىزدىڭ بۇل سالاداعى تاجىريبەمىز دۇنيە جۇزىنە ءمالىم, كوپتەگەن ەلدەر وعان قىزىعۋشىلىق تانىتۋدا, – دەدى ەلباسى.
كەزدەسۋ بارىسىندا وڭىرلەردەگى دوستىق ۇيلەرىنىڭ جۇمىسىنا باسا كوڭىل ءبولىندى. تۇڭعىش پرەزيدەنت ايماقتاردا قوعامدىق كەلىسىم مەن جالپىۇلتتىق بىرلىك باعىتىنداعى مەملەكەتتىك ساياساتتى ودان ءارى جۇزەگە اسىرۋ ءۇشىن اكىمدىكتەر مەن قازاقستان حالقى اسسامبلەياسىنىڭ بىرلەسكەن جۇمىسىنىڭ ماڭىزدىلىعىن اتاپ ءوتتى.
سوڭىندا قازاقستان حالقى اسسامبلەياسىنىڭ توراعاسى بىرقاتار ناقتى تاپسىرما بەردى.