قازىر ماسكەۋدە 800 مىڭداي شەتەلدىك ازامات جۇمىس ىستەيدى. ءبىر جىل بۇرىن ميلليوننان استام ادام بولعان. ولار – قىرعىزستان, وزبەكستان جانە تاجىكستان ازاماتتارى, دەپ حابارلايدى Egemen.kz «ريا نوۆوستيگە» سىلتەمە جاساپ.
بۇل تۋرالى رەسەي فەدەراتسياسى ىشكى ىستەر مينيسترلىگىنىڭ ماسكەۋ قالاسى بويىنشا باس باسقارماسىنا قاراستى كوشى-قون ءبولىمىنىڭ باستىعى دميتري سەرگيەنكو ايتتى.
«ماسكەۋدە تۇراتىن شەتەلدىك ازاماتتاردىڭ سانى 21% -عا ازايىپ, 789 مىڭعا جەتتى. وتكەن جىلدىڭ ءدال وسى كەزەڭىندە ولاردىڭ سانى ميلليوننان اسقان ەدى», دەدى د.سەرگيەنكو ماسكەۋدىڭ قوعامدىق پالاتاسىنداعى قاۋىپسىزدىك, كوشى-قون ساياساتى جانە ۇلتارالىق قاتىناستار جونىندەگى كوميسسيانىڭ وتىرىسىندا.
سونداي-اق ولاردىڭ كوپشىلىگى رەسەيگە زاڭدى تۇردە كەلگەندىگىن ناقتىلاپ ءوتتى.
رەسەيگە ۆيزامەن كەلگەن شەتەلدىكتەر قىتايلىقتار - 13%, تۇركيا مەن ۆەتنام ازاماتتارى - 10%.
«733 مىڭ شەتەلدىك جۇمىسشىنىڭ كوپشىلىگى قىرعىزستان - 30%, وزبەكستان - 27%, تاجىكستان - 20% ازاماتتارى», دەدى كوشى-قون ءبولىمىنىڭ باستىعى.
ونىڭ ايتۋىنشا, 2021 جىلدىڭ ءبىرىنشى توقسانىندا شەتەلدىك ازاماتتاردى كوشى-قون بويىنشا تىركەۋگە الۋ كورسەتكىشى 41,4% -عا تومەندەگەن.
كوشى-قونعا تىركەلگەن شەتەلدىكتەر مەن ازاماتتىعى جوق ادامداردىڭ باسىم بولىگى ماسكەۋگە جۇمىس ىستەۋ ءۇشىن كەلگەن. ال رەسەيدە ءجۇرۋ مەرزىمىن ۇزارتۋعا بايلانىستى كوشى-قونعا تىركەلگەن شەتەلدىكتەردىڭ سانى 42% وسكەن.