بيىل ادامزاتتىڭ عارىشتى باعىندىرعانىنا – 60 جىل. زاڭعار كوككە جاسالعان العاشقى جورىق تاريح ساحناسىنان ويىپ تۇرىپ ورىن الدى. سودان بەرى قۇس جولىنىڭ قۇپيالارى بىرتە-بىرتە شەشىلىپ كەلەدى. اسپان شىراقتارى مەن ادامدار اراسىنداعى بايلانىس كۇننەن-كۇنگە نىعايا تۇسۋدە. ەندى, مىنە, ءاربىر جەتىستىك ارحيۆ بايلىعىنا اينالۋدا.
العاش رەت «ادامعا تابىن, جەر, ەندى!» دەپ جىرلاعان قازاقتىڭ قابىرعالى قالامگەرى ولجاس سۇلەيمەنوۆ ءاربىر بالانىڭ ساناسىنا «وسكەندە عارىشكەر بولامىن» دەگەن اسقاق ارماندى ۇيالاتتى. بۇلتتىڭ ارعى جاعىنداعى الەمدى زەرتتەۋگە قۇشتار جاستار كوبەيىپ, وقۋشىلار استرونومياعا اۋەستەندى. ارينە مۇنىڭ ءبارى 1961 جىلى 12 ساۋىردە عارىشقا ۇشقان العاشقى ادام يۋري گاگارين ەرلىگىنەن تۋعان ادەمى اسەر ەدى. ەندى بۇگىن سول اياۋلى ساتتەر مۇراعاتتار مىنبەرىندە قول بۇلعاپ تۇر.
مۇراعاتتار دەمەكشى, وسىعان بايلانىستى رەسەي ەلىندە «جۇلدىزدارعا جول» اتتى حالىقارالىق فوتوكورمە ۇيىمداستىرىلدى. ۋليانوۆ وبلىسىنىڭ مەملەكەتتىك ارحيۆتەرى ۇيىمداستىرعان ايتۋلى شاراعا نۇر-سۇلتان قالاسى مەملەكەتتىك ءارحيۆى دە ءوز ۇلەسىن قوستى. قالالىق ارحيۆتە جاتقان قۇندى قۇجاتتار مەن باعالى سۋرەتتەردى ورىس حالقى تاماشالاپ, قازاق ەلىنە ريزاشىلىعىن ءبىلدىردى.
«ەكى ەل اراسىنداعى ارحيۆ سالاسىنداعى ىنتىماقتاستىق وسىنداي يگى شارالارعا مۇرىندىق بولۋىمەن ەرەكشە. تۇڭعىش ۇشقىش يۋري گاگاريننىڭ «ۆوستوك-1» تاسىعىشى قىزىلوردا ايماعىندا ورنالاسقان بايقوڭىر عارىش ايلاعىنان ۇشىرىلعانى ەل جادىندا. سودان دا بولار عارىش جايلى اڭگىمە ايتقاندا كوپشىلىكتىڭ كوڭىلى ەلەڭدەي تۇسەدى. ءبىزدىڭ مۇراعاتتا كوسموناۆتيكا سالاسىندا قىزمەت ەتكەن مامانداردىڭ باعالى زاتتارى بار. عارىشكەرلەردىڭ ومىرىنە قىزىققان ءاربىر ادام كەلىپ كورۋىنە بولادى», دەيدى قالالىق ارحيۆ ديرەكتورى مەيرام بەكتەمباەۆ.
فوتوكورمەگە «ۋليانوۆسكايا پراۆدا» گازەتىنىڭ بۇرىنعى باس رەداكتورى يۋري رومبوۆسكيدىڭ تاسس فوتو مۇراعاتىنان العان بىرەگەي قۇجاتتارى, بايقوڭىر كوسمودرومىندا ۇزاق جىلدار بويى قىزمەت ەتكەن رينات يليازوۆتىڭ فوتوسۋرەتتەرى مەن جەكە قۇجاتتارى قويىلعان. كورمەدە عارىشكەرلەردىڭ قولتاڭبالارىن قوسا العاندا بارلىعى 120-دان استام قۇجات ۇسىنىلىپتى.
«ادامنىڭ العاشقى عارىشقا ۇشۋىنىڭ 60 جىلدىعىندا عارىش سالاسىنىڭ وتكەنى, بۇگىنى مەن بولاشاعى تۋرالى ايتۋ وتە ماڭىزدى. تاريحتى ساقتاۋشىلار رەتىندە ارحيۆشىلەر بىزگە, وتكەن عاسىردىڭ ورتا شەنىنەن باستاپ, بۇگىنگى كۇنگە دەيىن كوسموناۆتيكانىڭ قول جەتكىزگەن جەتىستىكتەرىن انىق كورسەتەدى. بۇل جاستار ءۇشىن وتە ماڭىزدى», دەيدى ۋليانوۆ وبلىسىنىڭ ونەر جانە مادەنيەت باسشىسى ەۆگەنيا سيدوروۆا.
ءيا, ارحيۆتەگى ايعاقتارعا قاراپ عارىشكەرلەردىڭ ءجۇرىپ وتكەن جولىنىڭ سىزباسىن كورۋگە بولادى. وعان ۇڭىلگەن سايىن كوزىڭ اشىلىپ, جان دۇنيەڭ ءبىر ىسىنىپ, ءبىر سۋىنارى حاق. قۇددى بالا كۇنگى ارمانىڭمەن قولۇستاسىپ تۇرعاندايسىڭ. وندا عارىشكەرلەردىڭ ايتىپ كەتكەن سارا ءسوزى مەن عيبراتتى عۇمىرىنىڭ ۇزىگى بار. قاسيەتتى قۇجاتتارعا ءتىل ءبىتىپ سويلەيدى, جان ءدىرىلى مەن ايعاقتى سىرىن ايقارا اشىپ, تىلدەسەدى.